Comunicat stampa

Al pröm de mà metarà man l’Expo 2015 a Milan. Le Südtirol se presentarà te chësta ocajiun cun n stand a pert. „Le moto universal dla manifestaziun è ’Nudrì la tera, energia por la vita’ che se coliëia inće dër bun cun le Südtirol. Cun nosta presënza orunse ti pité ai vijitadus n’odlada reala ala manira de vire südtiroleja“, insciö le presidënt Kompatscher incö ala presentaziun dl stand südtirolej.

Ćina la fin de merz pon se scrì ite por l’ann 2015/16 dles scores de musiga y por les edemes da d’isté 2015. Les iscriziuns por les scores de musiga dla Val Badia y de Gherdëna mëss gnì dades jö tles döes direziuns cun sënta a La Ila y a Urtijëi.

Inće chësc ann arà i mituns y les mitans danter i 10 y i 11 agn la poscibilité da tò pert a dui cursc (un por talian y l’ater por todësch) de „Junior ranger di parcs natuari“, na scomenciadia che „à l’obietif da informè i mituns sön plü temesc che reverda la natöra y sön le dërt comportamënt da tignì sön les munts y ti bosć“, insciö l’assessur por l’ambiënt Richard Theiner.

Le Südtirol y le Trentin confermëia sües posiziuns ai pröms posć sciöche les regiuns plü „vërdes“ dla Talia: chësc é le resultat dles valutaziuns sön la green economy dl 2014 publicades da püch. „La planificaziun detaiada dl Südtirol cun le plann tlima 2050 porta bele śëgn sü früć“, sotlignëia l’assessur por l’ambiënt y l’energia Richard Theiner.

Odëi sciöche al vëgn laurè söl post, analisé le svilup dl insegnamënt tles scolines y constatè la complessité dl laûr dles maestres aldedaincö:chisc é stà i punć prinzipai dla vijita da inier (26/02) dl assessur Florian Mussner, dl intendënt Roland Verra, dl’ispeturia Edith Ploner, dla direturia Hannelore Insam y dla responsabla por l’intlujiun Carla Comploi a n valgönes scolines dla Val Badia.

La reuniun coletiva di Consëis dles ëres dl Südtirol y dl Tirol y les scomenciadies dla Comisciun por l’avalianza dles oportunitês: chisc sarà i temesc zentrai che gnarà presentà dal’assessuria Martha Stocker le proscim vëndres (ai 6 de merz) en ocajiun dl dé internazional dles ëres che vëgn festejé ai 08 de merz.

En lönesc, ai 09/03 s’incunta i rapresentanć dles scolares y di scolars dl‘Euregio por presentè deboriada sües ghiranzes, danterater sön „l’educaziun politica“, la mobilité y i sistems de valutaziun y por se baratè fora cun le rapresentant di scolars federal austriach Lukas Faymann. Do la sentada plenara danmisdé él preodü na conferënza stampa dales 14.30.

Cun indoman (28 de forà) se röia l’invern meteorologich, tl Südtirol él le terzo plü ćiöbe dal ann 1850 cun na temperatöra mesana de 2 degrà sura le valur de de plü agn. Le bilanz dl Sorvisc Meteo dla Provinzia à segnalè che a Balsan é la temperatöra mesana stada de 4,4 degrà. Le dé plü ćialt cun la temperatöra plü alta (+21°) é gnü mosoré a Laces tla Val Venosta.

Incö, mercui ai 25 de forà, él gnü presentè dal Istitut por la promoziun di lauranć (IPL) a Balsan n stüde sön i sistems desfarënć de welfare ti stać europeics en presënza dl presidënt dl Istitut Toni Serafini y dl’assessuria provinziala por le welfare Martha Stocker.

Por daidé i scolars y les scolares dla scora mesana da to la dezijiun sön ći scora alta chirì fora vëgnel organisé plü dis dla "porta daverta" y manifestaziuns d’informaziun te döt Südtirol: ai 03 de merz él sön le program le Dé dla porta daverta tl „ITE – WFO – Sport Raetia“ a Urtijëi y ai 06 de merz tla Scora d’Ert „Cademia“ y scora profescionala por l’artejanat artistich.