Comunicat stampa

La Junta provinziala á aprové incö (ai 22 de merz) le dessëgn de lege de reforma dla scora. I assessurs provinziai söl’istruziun Florian Mussner, Christian Tommasini y Philipp Achammer presentará les mudaziuns plü importantes en jöbia ai 24 de merz a Balsan.

Do la sentada dla Junta provinziala de incö (ai 22 de merz) á le presidënt Arno Kompatscher fat na detlaraziun söi atentac de terorism a Bruxelles. „Al se trata de n atach ala democazia, al’Europa y a nüsc valurs – á dit le presidënt – y i sun damaná da i defëne cun vigni meso.“

Amplié les funzionalités dl Südtirol Pass family por ti consintí ales familes da anuzé i mesi dl trasport publich local y da aprofité de reduziuns de prisc pro l’adoranza de strotöres por le tëmp lëde tl Tirol, tl Südtirol y tl Trentin: chësc é l’obietif prinzipal dl’EuregioFamilyPass. La Junta provinziala á aprové incö (22 de merz) le proiet dl layout dla cherta.

La Junta provinziala á aprové incö le program 2016 dla cooperaziun al svilup: cina al 2018 gnará les ressurses finanziares aumentades de cotan. Por le 2016 él gnü inserí tl bilanz indöt 4 miliuns de euro cun n aumënt dl 50 porcënt dles ressurses tl confrunt dl ann passé. Danterater él preodü intervënc de sostëgn tl Lebanon y tla Iordania.

La Junta provinziala á dé süa aprovaziun incö (ai 22 de merz) ala pröma pert de finanziamënc dl 2016 por le sostëgn de films y documentars che vëgn realisá tl Südtirol. I esperc y l’IDM Südtirol, l’Aziënda speziala por l’economia, á stabilí i pröms 8 proiec da sostigní tres le Fonds südtirolej dediché ala produziun de films y documentars.

Razionalisé y reorganisé les partezipaziuns dla Provinzia tles sozietés, ti ënc y organisaziuns te n’otica de smendrimënt di cosć, mioramënt dl’efiziënza y de na maiú trasparënza. Da IDM al’Alperia, da Hospital Parking a Brennercom, i resultac dl plann presentá dal presidënt Arno Kompatscher é gnüs aprová incö (ai 22 de merz) dala Junta provinziala.

Indöt 84 partezipanc á tut pert en vëndres ai 18 de merz ala fasa finala dles Olimpiades de talian a Roma cun concorënc da dötes les Regiuns dla Talia, mo ince dal’Algeria, dala Grecia, dala Germania y dala Spagna. Por le Südtirol á tut pert Lisa Verginer da San Martin de Tor y Philipp Augschöll che é stá bugn da arjunje resultac demorvëia.

Söporjö 120 operadus di museums che vëgn da döta la Provinzia s’á incunté incö, en lönesc ai 21 de merz, al Messner Mountain Museum Firmian en ocajiun dl De di Museums dl Südtirol, le convëgn spezialisé organisé vigni ann dala Repartiziun Museums. De plü é stá i intervënc proponüs tl contest dla tematica „Museums danter cultura y dialogh“.

Trames döes les biblioteches provinziales da Balsan, la „Claudia Augusta“ y „Dr. Friedrich Teßmann“ lacia alsavëi che les biblioteches restará stlütes da en vëndres ai 25 cina en lönesc ai 28 de merz.

La tröpa nëi che é gnüda jö ai 5 de merz sön le Ju de Frara á porté a n caos sön strada. La Repartiziun Sorvisc Strades dla Provinzia é gnüda criticada de ester la gaujia de chësta situaziun. „Chëstes critiches ne á degöna fondamënta y vá cuntra l’ënt falé“, sotlignëia l’assessur Florian Mussner.