Comunicat stampa

L Assessorat provinziel Ladin dedichea l domesdì de duman, vënderdi 20 de setëmber, al raport jëuni - cultura. Chësc argumënt sarà zënter dl tradiziunel “Di dla Cultura Ladina”. Tl palaz Widmann a Bulsan uniral deberieda cun l Presidënt dla Provinzia y l assessëur ladin jit do ala dumanda co che la cultura muev i jëuni y co che i jëuni muev la cultura. Te n referat uniral tratà i jëuni y l mond di social network.

Chëst ann à 61 jëuni fat ejam de stat y nsci finà via la scoles autes ladines: n’arjonta che l’Assessorat provinziel Ladin à ulù festejé deberieda cun i jëuni che ie ruvei a n mumënt de si vita, te chël la se trata de tò dezijions mpurtantes. Chësta ucajion ie unida zelebreda (NSNUET) ai 13 de setëmber tl zënter dla scoles autes a Urtijëi.

Ai 12 de setëmber él gnü istituì la comisciun dles lîtes cun l’inćiaria da controlè che les lîtes provinziales di 27 d’otober vëgnes tignides regolarmënter. Bele pro süa pröma sentada s’àra dè jö da öna na pert cun les condiziuns por eserzité le dërt de lîta passif y dal’atra cun le dërt de lîta por corespondënza.

La dlacia dl permafrost y si cunseguënzes sun l’eghes tl ejëmpl dl Lech dl Dragon sun Mëisules ie l cuntenut de doi manifestazions: n vënderdi ai 20 de setëmber vëniel te Sëlva mustrà per l prim iede n film che trata chësc argumënt y l di do, la sada ai 21, vëniel fat n’escurscion al Lech dl Dragon.

Dan da 650 agn él gnü surandè la contea dl Tirol ai Habsburg. Por chësta ocajiun inviëia la Biblioteca provinziala Teßmann adöm cun l’Archif provinzial dl Südtirol, le Tiroler Geschichtsverein/Seziun da Balsan y l’Academia dles sciënzes austriaca a na sëra de referać, en mercui ai 25 de setëmber dl 2013.

Duman vënderdi 13 y n lunesc ai 16 de setëmber à i partic y la listes che uel fé pea la lites provinzieles dl 27 de utober, la puscibltà de dé ju i sënies de lista tla Direzion generela dla Provinzia.

L Assessorat provinziel Ladin dedichea l 20 de setëmber al raport jëuni - cultura y trata chësc argumënt tl tradiziunel “Di dla Cultura Ladina”. Tl palaz Widmann a Bulsan uniral deberieda cun l presidënt dla Provinzia Durnwalder y l assessëur Mussner jit do ala dumanda co che la cultura muev i jëuni y co che i jëuni muev la cultura. Te n referat uniral tratà i jëuni y l mond di social network.

Produzions de televijion per ladin finanziedes dala Provinzia da udëi per duc: chësta puscibltà vën śën data tres internet sun l canal Youtube dla Provinzia de Bulsan (www.youtube.com/ProvinziaBulsan). La plataforma video à aldò dl assessëur Mussner doi fins primeres: “Tres la plataforma nueva vëniel mustrà su la mendranza ladina sun n canal nternaziunel y pità trasparënza sun proiec finanziei dala Provinzia”.

L medemo spirt, i medemi fins y la medema grupes de referimënt: l minister per l lëur, Enrico Giovannini à (NCUEI) ai 10 de setëmber pra n cunvëni a Bulsan sorissa tant che l program per l lëur dla Jonta provinziela ti semieia a chël dl Stat. Purempò se à i assessëures Roberto Bizzo y Sabina Kasslatter Mur damandà dal Stat plu lerch de muvimënt per vester bon de ti tenì permez ala dejocupazion.

A Al Plan de Mareo él gnü stlüt jö en domënia la formaziun da junior ranger. I pici ranger à podü pié do le diplom de junior ranger di parcs naturai dl Sudtirol dai colaboradus dl parch natural y dai rapresentanć dla Lia da Munt Ladinia Val Badia.