Comunicat stampa

L nseniamënt dla segonda rujeneda dëssa unì ntensificà tla scoles tudësces cun programs aposta y cun la maniera de nseniamënt CLIL. La Jonta provinziela à (NCUEI) ai 08 de lugio dat pro chësc var che ie bele unì fat tla scoles talianes y ladines sorissan l respet dl Statut d’Autonomia. Tla scoles autes ladines an bele fat prima esperienzes de traté vel tematica per nglëisc.

La Provinzia de Bulsan à ntan l ultimo ann paià ora 514 families cun 814 mutons cun genitores spartì, ulache una pert di genitores ne tën nia ite l duvier de paië l mantenimënt. La Jonta provinziela à (NCUEI) ai 08 de lugio nciarià l Aucatura dla Provinzia de crì manieres per fé paië i peresc si pert metuda dant dala suneria.

N cunzet de mubilità per dut l raion dla Dolomites ie l ubietif dl assessëur ala cuntreda y presidënt dla fundazion Dolomites-Unesco Elmar Pichler Rolle. Si vijion ie chëla de n raion cun puech trafich, ma zënza destò l mesun de ruvé permez ai luesc. La prupostes de mubilità ie states argumënt de n’ancunteda cun l deputat Daniel Alfreider.

Cun la daurida de “Teramënter” scomëncia en vëndres, ai 12 de lugio na linia de cin mostres artistiches da d’isté tl Istitut Ladin Micurà de Rü a San Martin de Tor y öna tla sala dla Lia Mostra d’ert a Urtijëi. Pro la pröma mostra él da odëi laûrs de Irina Tavella y Roberto Pallestrong.

L ann de scola 2012/13 fina chisc dis nce via per i candidac dl ejam de matura. I assessëures provinziei ala scola Mussner, Kasslatter Mur y Tommasini fajerà deberieda cun i ntendënc n rendicont dl ann de scola.

N ann plu abenëura che prugramà ie l plann per de plu stieres jit n droa cun 44 pruvedimënc. L plann per de plu stieres ti proscimi ani ie (NCUEI) ai 04 de lugio unì prejentà dal assessëur Roberto Bizzo. La se trata de n prugram strategich che dà dant l cheder per la politica economica y dla stieres n cont de pruvedimënc per chiche ne à nia na stiera, l’ëiles, jënt de età y n’economia che adrova stieres nueves.

I presuposc urbanistics y de tecnica ambientela per la trassa nueva dla furnadoia de Dantercëpies te Sëlva ie anjiniëi. La Jonta provinziela à azetà la mudazion al plann urbanistich y la valutazion de dann ambientel.

Davia che n lunesc uniral te Cunsëi provinziel bele metù man la descuscion dla lege urbanistica, se anconta la Jonta provinziela ai 8 de lugio per na senteda plu curta. La tradiziunela cunferënza stampa dl presidënt Durnwalder do la senteda ne unirà nia fata.

Te n’ancunteda (NCUEI) ai 03 de lugio a Roma ne ie la regions y provinzies autonomes nia ruvedes a una sun co che les dëssa dé si cuntribut a ressané la finanzes stateles. L assessëur Roberto Bizzo, che à reprejentà la Provinzia de Bulsan sorissea che l fossa iust l’aministrazions autonomes che messëssa demustré de tré dutes dl medemo vieres. Zënza ruvé a una, nsci Bizzo, ne resteral auter che jì dan la Cëurt costituzionela.

L lëur pioniristich che Carl Insam ova scumencià dan 36 ani pra la RAI de Bulsan ie deventà na seva mpurtanta per mantenì y fé viver la mendranza ladina. Dai prim de lugio ie Insam n pension: l assessëur ladin Florian Mussner l rengrazia publicamënter per si lëur jurnalistich che à nce abù na fazion de gran valor per la rujeneda ladina.