Comunicat stampa

Te na culaburazion danter la Provinzia de Bulsan, l Chemun de Urtijëi y l Museum de Gherdëina an abinà na soluzion per l problem dla lerch tla Cësa di Ladins. Te na prejentazion a Urtijëi iel (NCUEI) ai 06 setëmber unì fat al savëi che tla Cësa de Cultura de Urtijëi uniral anjenià ite na sënta destacheda dl Museum de Gherdëina.

L servisc de previjion dl tëmp cun na lingia de nfurmazions y servijes tla rujeneda ladina ie unì ngrandì y vën da (NCUEI) 5 de setëmber prejentà sun la plata web nueva www.provinzia.bz.it/meteo-ladin. "Te chëla che la Provinzia pieta śën l servisc meteo te duta si vela nce tla rujeneda ladina, vën nosta rujeneda de mendranza nce te chësc cajo trateda ala pèr cun l’autres" sorissea l assessëur Florian Mussner.

Tla cater scoles autes di luesc ladins ne à 62 sculeies nia finà via l ultimo ann de scola defin positivamënter y à d’instà mo pudù fé do n ejam de singula materies. Puec dis dan che scumëncia l ann de scola nuef ie 85,5 percënt de chisc candidac passei l ejam da instà y possa nsci passé tla proscima tlas.

A Al Plan de Mareo él chisc dis gnü tachè ite i aparać nüs por dè inant i coliamënć de internet aslöm ala popolaziun. “I ùn aspetè ert che la Telecom ativass chësta zentrala, mo śëgn éra tan inant che i zitadins po se colié al internet aslöm y ester colià cun döt le monn” sotrissëia l’assessur provinzial Florian Mussner.

Ntan la lingia de cunzerc Valgardena-Musika à feter 300 ciantarins y strumentisć de Gherdëina purtà dant doi cunzerc cun opres musicheles de marueia. L assessëur ladin Florian Mussner sorissea la scumenciadiva straurdinera dl urchestra Sonoton deberieda cun i cores dla valeda, metan a cuer l valor dl livel musichel y l spirt de culaburazion. I doi cunzerc à trat adalerch passa 2000 ascutadëures.

“Mparé a cunëscer la rujenedes y la cultures per se giaurì al’Europa y per ntegré miec chëi che vën a viver da nëus” chësc ie stat un di pensieres zentrei che l assessëur ladin Mussner y l ntendënt Verra à (NCUEI) ai 03 de setëmber dat pea ala cumenanza de nsenianc y respunsabli dla scola. Tl “Di dla Scola Ladina” a Urtijëi iel nce unì jit plu sot ala tematica dla funzion dla valutazion di sculeies.

I argumënc prinzipei tratei ai doi de setëmber dala Jonta provinziela y prejentei ai media dal presidënt Luis Durnwalder.

Davia che la cumpëida de persones tuchedes da malaties demetes ie daniëura tl crëscer, iel de bujën de miuré la pusciblteies de cumpaniamënt. L presidënt dla Provinzia Durnwalder à fat al savëi che a Margreid uniral fat n zënter cun 20 de pitli cuatieres. L cunzet de chësc zënter prejenterà l assessëur Richard Theiner n mierculdi ai 4 de setëmber a Margreid.

Doi nuviteies n cont dl’efiziënza energetica ie (NCUEI) ai 2 de setëmber unides nviedes via dala Jonta provinziela. L’ublianza che cëses nueves muessa arjonjer l livel “Cësa tlima A” ie unida spënta al 2017. Per ressanamënc de vedla cëses uelen mëter a jì na categuria nueva dla zertificazions “Cësa tlima”.

Te nianca doi mënsc dan la veles provinzieles uel la Jonta provinziela mo purté inant sies leges. L presidënt Durnwalder à (NCUEI) ai doi de setëmber cunedì la prupostes de lege che à priorità.