Comunicat stampa

La lites provinzieles 2013 ie finedes via y da mesa la cater domesdì ie nce i resultac provisories dan man cun la spartizion di mandac. Aldò de chisc saral ntan la proscima legislatura nuef partic tl Cunsëi provinziel, la majera frazion ie inò la SVP cun 17 cumëmbri.

La strategia de Bulsan per ruvé a n’acurdanza finanziera nueva cun l Stat, ie (NCUEI) ai 28 de utober unida data pro dala Jonta provinziela. Aldò de chësta strategia ne dëssa la Provinzia de Bulsan ne nia me plu giape l 90 percënt dla chëutes che vën paiedes ite tl Sudtirol, ma l 100 percënt. Da pert de Bulsan unissel perchël sëurantëut dut l custimënt che l Stat à tl Sudtirol.

La ujes de lista per la Lites provinzieles de Bulsan ie ti luesc ladins cumpededes ora. Te chisc ot chemuns ladins ie la Südtiroler Volkspartei unida liteda cun l 59,8 percënt, dan “Die Freiheitlichen” cun 15,5 percënt y la lianza “Bürger Union-Ladins Dolomites-Wir Südtiroler“ cun 10,1 percënt. Tan de reprejentanc che uni grupa giapa tl Cunsëi provinziel nuef savran permò canche la zedules de vela de duta la provinzia sarà cumpededes ora.

77,7 percënt di zitadins cherdei ala veles, 289.766 persones, à ncuei dat ju si stima per l Cunsëi provinziel nuef de Buslan. Paredlan chësta perzentuela al’ultimo iede, dan cin ani, ie chësc n manco 2,4 ponc de percënt. Ti chemuns ladins à lità l 79,3 percënt, che ie 3,5 ponc de manco che dan cin ani.

83.388 ie ncuei danmesdi, nchin la 11.00, stai a dé ju si usc per la lites provinzieles 2013. Chësc fej ora l 22,4 percënt de chëi che ie cherdei a lité y a chësta maniera 0,8 ponc de manco perez a dan cin ani. Ti chemuns ladins à nchinamò lità l 23,6 percënt.

Duta la pertes nteressedes al stritoz dl strom tla Venuesta à (NCUEI) ai 25 de utober laudà l ruvé a una sciche n bon cumpromis. I scioldi per l ambiënt ie bele unic nviei via ai trëi chemuns nteressei Laas, Martell y Latsch. A n’acurdanza de mascima iesen nce ruvei n cont dla cunzescion y l mené dla zëntrela Laas/Martell y dl sëurantò dla rë dal strom.

L cunsëi provinziel nuef vën lità n dumënia 27 de utober. La sëntes de vela gëura dala 6.00 y l puderà unì lità nchin dala 22.00. Lunesc da duman uniral scumencià a cumpedé ora la ujes y la cumpëides puderan udëi do y do tres internet. Dut l partimënt basite dl palaz Widmann a Bulsan sarà dedica al zënter media.

Al n’é plü nia che sta te tru ala realisaziun dl Zënter bibliotecar nü. Ai 23 d’otober à le Presidënt dla Provinzia Luis Durnwalder y l’ombolt da Balsan Luigi Spagnolli presentè le proiet cultural y sotescrit l’acordanza che regolamentëia i raporć de spersa y de proprieté danter la Provinzia y la Cité de Balsan. Śëgn pol gnì dè la conzesciun da frabiché y, sciöche al pê ćiamò chëst ann, déssel gnì scrit fora i laûrs de demoliziun di frabicać da śëgn.

N dumënia, 27 de utober vëniel lità l Cunsëi provinziel nuef. La sëntes de vela sarà daviertes dala 6.00 ala 22.00, n pratica puderan lité da ntëur la 7.30 inant. A na maniera che duc i zitadins posse se nuzé dla modaliteies de vela, iel bel śën duta la nfurmazion sun la lites provinzieles online. Sibe la nfurmazion danora, che la plates web cun i resultac, ie unides anjeniedes te trëi rujenedes. Per l prim iede saral pra i resultac nce na sezion dedicheda ai chemuns ladins.

400.958 zitadins dl Sudtirol puderà n dumënia, 27 de utober lité l Cunsëi provinziel nuef. De chisc nen iel 27.908 che puderà lité tres lëtra. A chësta maniera ie la cumpëida di zitadins cun dërt de vela auzeda de 13.162 permez ala veles dan cin ani.