Comunicat stampa

USP – A Bulsan ie ncuei (15 auril) unì prejentà la mostra interregiunela dal titul Labirint:Lidëza che giaurirà ai 9 de mei tla furtificazion de Furtëza (Franzensfeste). L se trata de na mostra metuda a jì dai trëi assessorac ala cultura dla Provinzia de Bulsan n culaburazion cun l Land Tirol y la Provinzia de Trënt.

USP – I reperc archeologics che ie ultimamënter unic abinei tl raion de Ciastel y Sëuc sarà da udëi da duman, ai 16 nchin ai 26 de auril. La mostra particulera metuda a jì dal Ufize provinziel per bëns culturei sarà da udëi per diesc dies tla scola mesana “Leo Santifaller” a Ciastel. Ai 16 y 27 de auril uniral tenì doi cunferënzes.

USP - Per l ann de scola che vën se à tla scoles ladines scrit ite de plu sculeies permez al ann passà. Danter scolines, scoles de ublianza y scoles autes tla Val Badia y te Gherdëina, se à scrit ite 25 sculeies de plu. L pitl aumënt mostra su na situazion stabila tla doi valedes ladines. Per l ann de scola 2009/10 se à scrit ite de ndut 3.315 sculeies.

USP – La cëses de lën dla fundazion dla firma Rubner de Kiens dëssa vester de aiut tl raion tucà dal tremot a L’Aquila. Ncuei (14 auril) à reprejentanc dla firma de Puster prejentà n proiet al presidënt Durnwalder per fé su nchin a mile cëses pre-frabichedes te tëmp de trëi mënsc. La prima doi cëses à la fundazion dla firma Rubner scincà.

USP – I assessëures provinziel à ncuei (14 auril) prejentà si prupostes cuncretes per smëndrì la cunseguënzes dla crisa economica mundiela tla Provinzia de Bulsan. La Jonta provinziela ie nsci ruveda dan l ultimo var per stlù ju l pachetl de pruvedimënc. Do la senteda dla Jonta à l Presidënt Durnwalder prejentà de plu ponc de majer nteres.

USP – La rujeneda dl corp, modiei dla cunviver y l azeté de cuestions negatives ie i argumënc che la Cumiscion per la valivanza dla chances y l Ufize provinziel dl’ëiles mët a ji ntan chëst ena.

USP – La legrëza de cianté y de fé mujiga di sculeies dla scola elementera de S.Crestina ne n ie nia da fermé: te n proiet scolastich iel unì tëut su per l prim iede na CD cun cianties de cuntenut educatif y da plajëi, beles da scuté su per duta la familia. Pra la prejentazion ai 17 y 18 de auril a S.Crestina saral nce da udëi bai, n spetacul cun dia y nchinamei video clips. Cumpran la CD dal titul „Supermegafesta“ juden n proiet umaniter dla Caritas.

USP – Da n Sada Santa, 10 de auril, giaten inò la EventCard. “La cherta à ti ultimi ani drët valù y perchël ons nce ulù la pité chëst ann, cun miuramënc” dij l assessëur ala mubilità Thomas Widmann. Chëst ann vel la EventCard nia me da Maran per la Val Venunesta, ma bele da Bulsan demez.

USP – Cuestions de lerch y de personal tla sënta a Bulsan dla Suneria aministrativa regiunela (TAR) ie stai i argumënc prinzipei dl’ancunteda da ncuei (8 auril) a Bulsan danter l presidënt dla Provinzia Luis Durnwalder y Margit Falk Ebner, presidënta nueva dla sezion autonoma dl TAR de Bulsan.

USP – Chisc dis ie jites online la plates internet nueves dla Repartizion provinziela per la Cultura y Intendënza ladina. Sota l’adres www.provinzia.bz.it/ntendenza-ladina vëniel prejentà te trëi rujenedes la istituzion cun servijes, proiec y cuntac da pert dla Provinzia de Bulsan per la Cultura y scola ladina. Tres l cialé ora y la partizion nueva vëniel dat truepa nfurmazions che unirà do y do atualisedes.