Comunicat stampa

USP - L Ufize stampa dla Provinzia de Bulsan à mudernisà si plata internet tla rujeneda ladina. L servisc nuef per i media de rujeneda ladina y per duc i nteressei ie online da ncuei (23 auril) sota l’adres “provinzia.bz.it/uspl”. La comunicazion da pert l Guviern provinziel y di Servijes dla Provinzia de Bulsan vën fata cun comunicac stampa, video y ntervistes a usc, nce per ladin.

USP – Cun nvestizions, politica per l marcià dl lëur, mëter a desposizion scioldi, manco burocrazia y aiut te caji estremes juda la Provinzia de Bulsan a ti vester ala cunseguënzes dla crisa economica. Sun chësta streda ulël l Guviern provinziel stimulé l’economia da tlo y seguré la stieres. L presidënt Durnwalder y i assessëures à prejentà ncuei (23 auril) a Bulsan l pachetl de pruvedimënc.

USP – La Jonta provinziela à te si senteda da ncuei (20 auril) dat pro 500.000 Euro per judé la populazion tl Abruzzo, tucheda dal tremot. I pruvedimënc per judé la jënt dla Provinzia de Bulsan, tucheda dala crisa economica unirà prejentei te na cunferënza stampa n juebia danmesdì. Chësc à fat al savëi l presidënt dla Provinzia Luis Durnwalder, riesc do la senteda dal Jonta.

USP – Tl raion de Sterzing iel na lores ncantëur. Chësc vën fat al savëi dal Ufize provinziel per ciacia y pië pësc. Do la lores che à bonamënter passà l inviern sun l Jëuf Gampen, fossa chësta la segonda lores tl Südtirol. Aldò dla nfurmazions dl Ufize provinziel dëssel vester n tier speve che ne gauja nia gran problems.

USP – La cundizions acioche vëniel recunesciuda la figura prufesciunela de mediatëures culturei ie unides nviedes via n vënderdi (17 auril) tla cunferënza dla regions a Roma. “Chësc ie n var mpurtant de vies dl recunescimënt y nce n cont de valorisé chël che i mediatëures culturei fej per la ntegrazion tlo da nëus” dij l’assessëura provinziela Barbara Repetto.

USP – N mierculdi che vën, 22 de auril va n drova l bilanz provinziel y la lege finanziera per l ann 2009. L di dant, merdi, unirà tramedoi leges provinzieles publichedes tla plata ufiziela dla region. Nsci ie l bilanz provinziel ufizialisà cun 5,424 miliardes de Euro. “L ie n bilanz valivà ora cun nvestizions per na miliarda de Euro” à dit l assessëur la finanzes Barbara Repetto.

USP – A Bulsan ie ncuei (15 auril) unì prejentà la mostra interregiunela dal titul Labirint:Lidëza che giaurirà ai 9 de mei tla furtificazion de Furtëza (Franzensfeste). L se trata de na mostra metuda a jì dai trëi assessorac ala cultura dla Provinzia de Bulsan n culaburazion cun l Land Tirol y la Provinzia de Trënt.

USP – I reperc archeologics che ie ultimamënter unic abinei tl raion de Ciastel y Sëuc sarà da udëi da duman, ai 16 nchin ai 26 de auril. La mostra particulera metuda a jì dal Ufize provinziel per bëns culturei sarà da udëi per diesc dies tla scola mesana “Leo Santifaller” a Ciastel. Ai 16 y 27 de auril uniral tenì doi cunferënzes.

USP - Per l ann de scola che vën se à tla scoles ladines scrit ite de plu sculeies permez al ann passà. Danter scolines, scoles de ublianza y scoles autes tla Val Badia y te Gherdëina, se à scrit ite 25 sculeies de plu. L pitl aumënt mostra su na situazion stabila tla doi valedes ladines. Per l ann de scola 2009/10 se à scrit ite de ndut 3.315 sculeies.

USP – La cëses de lën dla fundazion dla firma Rubner de Kiens dëssa vester de aiut tl raion tucà dal tremot a L’Aquila. Ncuei (14 auril) à reprejentanc dla firma de Puster prejentà n proiet al presidënt Durnwalder per fé su nchin a mile cëses pre-frabichedes te tëmp de trëi mënsc. La prima doi cëses à la fundazion dla firma Rubner scincà.