Comunicat stampa

USP – La Repartizion ala Cultura ladina dla Provinzia de Bulsan à scrit ora n cuncors per duc i artisc’ ladins. Ncuei (18 merz) à la cumiscion abù si prima ancunteda per se anjenië ca. L cuncors per artisc’ ladins ie chëst ann nce unì giaurì a artisc’ dla valedes ladines dl’autra doi provinzies.

USP – Tl ann 2008 ie feter 80 % di candidac di luesc ladins passei i ejams de rujeneda. La media provinziela ie aldò dl Istitut per Statistica Astat de 50,9% che ie passei l ejam. De ndut iel stat de plu candidac che ie passei l ejam de bi- y trilinguism permez al ann dant. Me tl livel plu bas, l livel “D” iel stat de manco che ie passei.

USP – I nsenianc dla scoles ladines ne à ncuei (mierculdi 18 merz) nia fat pea l scioper. I sindacac AGB-CGIL ova cherdà a n scioper a livel naziunel contra l guviern Berlusconi. Tla scoles tudësces ne iel nianca stat 5% di nsenianc che a fat pea l scioper.

USP – N mer de culëures possen se aspité ti verzons dl Ciastel Trauttmansdorff che gëura ai prim de auril. Chëst ann iel unì sentà ora 250.000 plantes che flëur abenëura.

USP – L Vizekanzler dl’Austria Josef Pröll ie ncuei (17 merz) stat tlermënter a una per l Tunel dl Prëner canche l à ancuntà l presidënt dla Provinzia Durnwalder a Viena. L ie nce unì rujenà dl recunescimënt di tituli de studi y dl bujën de culaburazion a Brüssel.

USP – L miuramënt dla ferata dl Prëner y l finanziamënt aldò ie ncuei stai zënter dl’ancunteda danter l Presidënt dla Provinzia Luis Drunwalder y l Kanzler austriach Werner Faymann, ncuei (17 merz) a Viena. Sëuraprò iel nce unì rujenà dl svilup te Südtirol, la Cunvenzion dl’Elpes y la recunescënza di tituli de studi.

USP – Avisa l di che l Luis Drunwalder à dan 20 ani metù man si ncëria da presidënt dla Provinzia, al ncuei (17 merz) ancuntà l presidënt dl’Austria Heinz Fischer. I doi presidënc à dantaprima rujenà dl svilup atuel dl Südtirol y dl nvit a Fischer de unì n vijita per l ann de cumemorazion 2009. Fischer à sorissà che tl raport danter Austria y Südtirol ne se à mudà nia.

USP – Tl ann 2010 toma la cunzescions dla Lia da Mont taliana CAI per la uties da mont dla Provinzia. “Nchin a ntlëuta nes muessa vester tler co che dëssa cialé ora l daunì dla uties” dij l assessëur al turism Hans Berger. Te n’ancunteda cun i respunsabli dl CAI se à Berger damandà che CAI y AVS tudësch, porte riesc n cunzet laurà ora deberieda.

USP – L bilanz dla regions autonomes puderà nce tl daunì unì menà zënza se tenì ai criteries de cunvergënza. La regions messerà judé a sparanië aldò di fins metui dant dal Stat. Chësc ie uni ora dala tratatives n cont dl federalism fischel di presidënc dla regions autonomes ncuei (16 merz) cun l minister Roberto Calderoli y Raffaele Fitto a Roma.

USP – L assessëur Florian Mussner lauda i trëi chemuns de Gherdëina che à n sada giapà na uneranza da pert dla lia VKE per la plazes da fé damat. “Canche l vën dat valor ai mëndri iel n sëni de sensibilità soziela y cualità de vita” sorissea Mussner.