Comunicat stampa

USP - Genitores possa ntan chëst ena mo scrì ite si mutons y mutans per l ann de scola che vën. L ultimo di per la iscrizions ala scoles elementeres y mesanes tla valedes ladines ie l 31 de jené 2009. La iscrizions ala scoles autes te Gherdëina y tla Val Badia possa unì fates nchin ai 31 de merz.

USP – L pont de majera mpurtanza dla senteda dla Jonta provinziela ai 26 de jené, ie stat co spartì su l bilanz de 5,4 Miliardes. La dezijion definitiva muessa mo unì tëuta. N cont dla reforma dla scoles ie l Guviern provinziel sfurzà a sëurantò la mudazions n cont dla valutazions di sculeies. La veles dl Chemun de La Ila unirà tenides ai 3 de mei 2009.

USP – La materies che unirà damandedes tla segonda prova scrita dl’ejam de stat tla scoles autes ladines ie unides crisses ora. La Ntendënza ladina à una cun l Ministèr dl Istruzion a Roma à nce fat ora ciuna materies che vën damandedes ora a usc dai cumëmbri dla cumiscion che vën da d’autra scoles.

USP - L bilanz provinziel 2009 ie stat l argumënt zentrel dla segonda senteda dla Jonta provinziela de jené. L presidënt Luis Durnwalder à prejentà n valgun ponc de majer nteres.

USP – Ntan i ultimi mënsc ie pra l spedel de Persenon unì frabicà da nuef 42.810 metricubich. Nscì iel unì finà via na gran pert dl renuvamënt dla cësa prinzipela. L presidënt dla Provinzia Luis Durnwalder, l assessëur ala sanità Richard Theiner y l diretëur dl raion saniter de Persenon Siegfried Gatscher à inier (15 de jené) danterëures giaurì la strutura nueva.

USP – Studënc possa da ncuei, 15 de jené, fé dumanda per borses de studi y pesc’. Chisc scioldi vën dai ora do l prinzip dla prestazion y nia sciche d’autra manieres de sustëni che ie basedes sun la situazion economica. De ndut iel unì scrit ora 342 borses de studi y 40 pesc’ dla prestazion.

USP – La cunescënza dla rujeneda nglëija ne ie te truep mestieres nia plu n savëi sëuraprò, ma na cundizion damandeda. La cunescënza dl nglëisc possen se lascé documenté tres ejams metui a jì de merz 2009 dal Ufize provinziel de bilinguism. Aldò dl livel possen se lascé nuté su nchin ai 22 de jené o 9 de fauré 2009.

USP – Te si senteda da ncuei (12 jené) à la Jonta provinziela de Bulsan udù dant la veles dl Chemun de Badia. Chëstes dëssa unì tenides danter l prim de mei y mez juni 2009. Danter i ponc de majera mpurtanza che ie unic prejentei dal presidënt Drunwalder iel nce la pruposta de lege per n aucat di jëuni, n proiet de medejina cumplementera y dis de tlausura per la Jonta provinziela.

USP – Tl ann 2009 à la Provinzia de Bulsan auzà de 4,4% la sëida per paië ora aiuc finanziei tl ciamp soziel. La tarifes per i servijes soziei ne vën alincontra nia auzedes. L auzé dl sëida per aiuc soziei y l nia auzé dla tarifes ie n var inant per desciarië pëis ai zitadins cun manco davani te tëmps de crisa” spiega l assessëur Richard Theiner.

USP – Genitores possa i dis che vën scrì ite si medri ala scolina per l ann de scola 2009/10. Sciche l vën fat al savëi dala diretëura dla scolines ladines Edith Ploner vën la iscrizions tëutes su l’ena dai 19 nchin ai 23 de jené 2009.