Comunicat stampa

La mostra dedicada a Leonardo da Vinci cun laûrs di scolars dla scora d’ert Cademia de Urtijëi sarà da odëi tla ciasa dla scora y cultura ladina a Balsan tratan i mëisc de dezëmber 2008 y jenà 2009. Hommage n mertesc 16 dezëmber dales cinch domisdé.

USP - L’Aministrazion provinziela à smendrì custimënc aldò dl pat de stabilità. La cunvenzion cun l servisc de aiut cun l joler ie unì slungià de n ann y de nueva diretives per l’atività de feries sun l luech da paur. Chisc ie n valguni di ponc de majer nteres che la Jonta provinziela à tratà ncuei, lunesc, 9 de dezëmber.

USP – Ai 14 de dezëmber va n drova l orar da inviern per la ferata. La majera nuviteies reverda chëst ann la valeda de Puster ulache ai 14 de dezëmber furnerà la ferates nueves.

USP – L stradon de Gherdëina danter S.Cristina y Sëlva vën ncuei (vënderdi 5 dezëmber) inò giaurì al muvimënt di auti. Per via de lëures ala streda de zircunvalazion nueva de S.Cristina oven messé s’aré l stradon tl raion Dorives. L prim toch dla streda de zircunvalazion nueva unirà giaurì tl ann nuef.

USP – Per via de lëures pra l lift dai stuei a La Ila, vën la streda dla Val Badia duman, vënderdi 5 dezëmber sareda ntan dut l di.

USP – Duman vënderdi (5 dezëmber) puderan furné sëura l puent nuef a Runcadic. “Davia che te chësta luegia danter Urtijëi y Puntives passa nce truepa roles, iel stat n gran lëur che ne ne vëija nianca a passé” spiega l assessëur ala stredes Florian Mussner. L puent ie unì finà te tëmp da record, adrët per l scumencé dla sajon.

USP – I artisc’ dla valedes ladines giapa na sburdla de mutivazion per jì inant su si streda artistica. La Repartizion ala Cultura ladina dla Provinzia de Bulsan à scrit ora n cuncors per duc i artisc’ ladins cun n pest de 15.000 Euro. “Chëst iede nvions nce i artisc’ dla valedes ladines tl’autra doi provinzies” spiega l assessëur provinziel Florian Mussner.

USP – La reforma dl artejanat ie unida stluta ju. La Jonta provinziela à da permò dat pro la pruposta dl assessëur Werner Frick n cont dla normatives per l artejanat y la normes de atuazion dl regulamënt per l artejanat.

USP – A Bulsan iel ncuei unì sëurandat i pesc’ per tesi sun argumënc che toca la valivanza di dërc danter ël y ëila. L prim pest à venciù Chiara Marcocci da Al Plan de Mareo che à scrit sun la mutilazion genitela dl’ëila.

L Istitut provinziel de statistica Astat à ti mënsc de setëmber y utober 2008 cumpedà 6,4% manco fulestieres ruvei adalerch y 4,0% manco nuetes afitedes, permez ai medemi mënsc dl ann passà. De instà iel stat na situazion plu stabila n cont dla cumpëida dla jënt unida adalerch (+0,2%) y n fregul de manco pra la nuetes afitedes (-0,8%). Tl ann turistich 2007/08 iel unì cumpedà 2,4% de plu turisc’ ruvei adalerch y 1,7% de plu nuetes afitedes.