Comunicat stampa

USP – La mostra interregiunela 2009 ie unida giaurida ncuei sada (9 mei) tl furtin de Furtëza, dal presidënt dla Provinzia Durnwalder deberieda cun i assessëures ala cultura dla Provinzia de Bulsan, de Trënt y dl Lond Tirol. „N labirint per abiné la lidëza“ chësc ie l pensier zentrel dla mostra che resta davierta nchin ala fin de utober.

USP - Sonn de tambürli, n arald y le oracl - le vedl lëgn , che röia da cuntè la storia dl virus “Syndrome“ che s’à mudé y de sü efe. Incö (9 de mà 2009) nes àl tla introduziun dla festa finala dl concurs online „syndrome 09" acompagné chilò sön la staziun dla ferata de Franzensfeste. Al concurs, laurè fora dal Heimatpflegeverband por l’ann iubilar 09 à tut pert 3500 jogn y jones. Le presidënt dla Provinzia Luis Durnwalder, l’assessuria Sabina Kasslatter Mur, l’assessuria dl Tirol Beate Palfrader y l’assessur dl Trentin Franco Panizza à premié i mius ogadus singui y i mius teams.

USP – Na delegazion de studënc rumanc dai Grijons dla Svizra anconta chisc dis la scola ladina. Tla Cësa provinziela Widmann a Bulsan à l assessëur Mussner y l ntendënt Verra inier juebia (7 mei) prejentà ravises y situazion atuela de nosta scola paritetica.

USP- I njenieres dl studio EUT de Persenon, l studio Bergmeister de Neustift y la “ILF Beratende Ingenieure” dal’Austria à venciù l cuncors de ideies per na streda de zircunvalazion de Sëlva. Si pruposta ie unida valuteda da na cumiscion sciche la miëura y plu realisticia danter 25 ideies mandedes ite. L’Assessorat provinziel per la stredes meterà a jì na mostra per lascé udëi duta la ideies mandedes che à fat pea l cuncors.

USP – Te Sëlva à l Istitut Culturel Ladin, l Chemun y la Bibliotech laurà deberieda per crië n zënter culturel. I locai nueves y locai che vën nuzei deberieda vën prejentei n sada ai 9 de mei dala cater domesdì cun la giaurida y n domesdì de porta davierta. L assessëur provinziel Florian Mussner giaurirà deberieda cun l ambolt de Sëlva Roland Demetz chësta prima pert de chël che deventerà l zënter culturel da Nives.

USP – Tres la tapa dl Giro d’Italia sun Mont de Sëuc uniral mustrà a milions de persones la bela cuntreda de nosc raion tres televijion . Chësc ie chël che n se aspieta prinzipalmënter dala tapa de n mierculdi che vën 13 de mei. La tapa che festejea i 100 ani dl Giro ie unida prejenteda ncuei (06 mei) a Bulsan dal presidënt dla Provinzia Luis Durnwalder.

USP – Per la scolines dla valedes ladines iel unì laurà ora ndicazions provinzieles nueves che tën cont dla situazion particulera cun de plu rujenedes. La ndicazions provinzieles dla scolina vëij danterauter nce dant de tenì cont dla cumpetënzes y dla situazion ndividuela di mëndri dla scolina. La ndicazions dates pro dal Guviern Provinziel de Bulsan unirà sën lauredes ora operativamënter y ntegredes man man tl’atività dla scolines.

USP – Cater telegrams de auguresc à l presidënt dla provinzia Durnwalder ncuei mandà ai ambolc nueves de Mals, Plaus, Prëner y de Badia. Cun i auguresc se mbincia Durnwalder nce na bona culaburazion danter Provinzia y chemuns.

USP – La Jonta provinziela de Bulsan à ncuei (04 mei) dat pro de plu finanziamënc per i chemuns y auzà l fond de rotazion a 100 milion de Euro, tl tres chël che l vën judà a paië ju i debic di chemuns. N cont de pitli ntervënc de frabiché y tla sanità iel unì smendrì burocrazia. La vedla utia dl famëi su Pices Fanes, tl Parch naturel Fanes-Sennes-Braies muessa unì zareda ju. Chësc à l presidënt Durnwalder prejentà ai media do la senteda dla jonta.

USP – N lunesc 11 de mei vijitea la Jonta provinziela i cantieres de Aicha y Mauls ulache l vën giavà l tunel esploratif dl tunel de basa dl Prëner. L presidënt Durnwalder cun i assessëures y reprejentanc di media se anconta dala 10.45 a Aica y pona dala 12.45 a Mauls pra l bocula dl tunel.