Comunicat stampa

Tl ann 2003 iel tl Südtirol unì giaurì 54 pruzesc de concurs, 5,2% demanco permz al ann dant. Permez ala cumpëida dla firmes fejel ora per l ann 2003 na media de 1,5 caji sun 1.000 firmes. La majera cupëida de pruzesc de concurs ntan l ann 2003 ie unida arjonta tl cuarto trimester cun 20 caji. La metà dla firmes jites n concurs ntan l ultimo ann ne fova nia plu vedles de nuef ani. Cëla nce l comunicat nr. 13 dl 3 de mei 2004 – Astat, tla njonta.

USP – Drët cuntënt se à mustrà l assessëur per l turism Thomas Widmann sun la zifres atueles dl turism da inviern tl Südtrol che mostrà sù n gran aumënt pra i turisc’ che vën dai paiejes dl Benelux. Widmann ie dla minonga che chisc resultac desmosta che l ie stata la drëta decijion per l Südtirol a se giaurì a marceies nueves te chëi che l ie da abiné l daunì turistich.

Aldò dla nrescides dl ASTAT ie la cumpëida di turisc’ ruvei adalerch tl mëns de merz 2004 caleda de 15,3% permez al medem mëns tl ann passà. Pra la nuetes afitedes ie la cumpëida tl medem mëns jita jù de 8,2%. La prima nfurmazions sun la sajon da invern 2003/04 da nuvëmber nchin a merz mostra purempò n aumënt de 7,6% pra i turisc’ ruvei adalerch y de 5,0% pra la nuetes afitedes.

USP – Cun l slargië dl’Union Europea de viers dl est giapa la scola la ncëria de ti giaurí l’udleda ala generazions nueves de viers dl’Europa. Cun chësta idea tol i trëi assessëueres ala scola, Florian Mussner, Otto Saurer y Luisa Gnecchi posizion sun l zapé ite tl’Union Europea da pert de disesc paejes. Furmazion y scola giapa na funzion zentrela tl ji permez ala barieres cultureles y de rujeneda, nscì la tëuta de posizion.

USP – Prudoc de cualità dl Südtirol da ciarcë ie unic pitei n dumënia passeda tl stadio "Giuseppe Meazza" a Milan pra l juech al palé de serie A danter Inter Milian y Lazio Roma. L Südtirol sciche sponsor ufiziel de juech à nvià a na presentazion de prudoc tla pertes resservedes ai VIP. La Provinzia ie unida rapresenteda dal assessëur Werner Frick.

USP – Duman da sëira, vënderdi 30 de auril uniral a Viena sotscrì l protcol nternaziunel danter l’Austria y la Talia per fé l tunel y la linia dla ferata nueva dl Brëner. L preisidënt dla Provinzia Luis Durnwalder sarà ënghe presënt.

Tl’ena danter l 3 y l 7 de mei tën l aucat populer de plu udienzes. N juebia ai 6 de mei nce a Urtijëi.

Usp – Per pudëi fé pea i cursc de basa da mëinacrëp, muessen danora avëi n ejam pratich de amiscion. Dal 4 al 6 de juni 2004 ie l proscim ejam de amiscion per chël che n possa se lascé nuté su nchin ai 14 de mei.

USP - Ciasarines che uel paië ite de si bona per la pension per arjonjer i ani damandei, possa nchin ai 30 de auril damandé n aiut dala Region. Nsci vëniel fat ala savëi dal Ufize provinziel per preudënza soziela ntegrativa.

USP – La Consulta Ladina per i Jëuni à pra si ultima senteda dat l bensté sun l cuntribut per frabiché l zënter nuef per jëuni, ert y cultura a Urtijëi. A una se à l cunsëi de consulënza per cuestions di jëuni ladins nce mustrà per l program de atività y nvestizions.