Comunicat stampa

Tl’ena danter l 26.01.2004 nchin ai 30.01.2004 tenirà i culaburadëures di ufizies provinziei per l artejanat udienzes tla sëntes destachedes.

Usp – Scumenciadives per la scola y la furmazion te chësta legislatura ie stai i argumënc al zënter de n’ancunteda danter l Assessëur ala scola ladina Florian Mussner y Josef Duregger cun Anton Senoner, rapresentanc di diretëures.

Usp – Per l cuarto iede uniral n merdi ai 27 de jené lecurdà tla Talia la vitimes dl rejim nazist. Tla scoles dl Südtirol uniral tenì n menut de chiet y riflescion per chësc avenimënt. „Nce nëus duc che vivon tla pesc, libertà y giustizia dasson tenì n mënt la vitimes dl rejim nazist“, scrij i trëi Assessëures ala scola Otto Saurer, Luisa Gnecchi und Florian Mussner te n comunicat.

Usp - Cun l 20 de jené ie jit n drova la lege statela che regulamentea la segurëza sun i purtoies dai schi. Tl Südtirol jiran do si streda per cuestions che reverda la regulametazion di purtoies dai schi, dij l Assessëur per cuestions Alpines Thomas Widmann.

Usp – Cuntrac de lëur a mez tëmp ne muessa nia plu unic dai ju pra l Ipetorat dl lëur dla Ripartizion provinziela per l lëur. Chësc duvier ie tumà cun la regulamentazion nueva dl lëur tres la riforma Biagi.

Usp – La materies per la sgonda prova scrita dl ejam de stat per la scoles autes ladines per l ann de scola 2003/2004 ie unides crides ora.

Usp- La sgonda Cumiscion per la defendura dl’ambient à te si senteda de chëst’ ena tëut tres de plu proiec. L presidënt Albert Torggler y si culaburadëures à dat l bënsté per miuré stredes tl Chemun de Sëlva y la streda dala rodes Kollmann - Blumau.

Per mëter la nfurmazions dla popluazion residënta a disposizion dl publich, à l Istitut de Statistica dat ora l liber nuef dla statisiches. L fin de chësta publicazion ie chël mëter a disposizion la nfurmazions statistiches per l svilup y la strutures tl Südtirol. Na majera pert ti ie unida dedicheda al paradlé cun l’Europa, per chël iel nce unì tëut ca nfurmazions dal Eurostat (Institut per Statistica dla Union Europea) y dal Istat (Istitut naziunel de Statistica).

L tëmp ntan l mëns de dezëmber ie stat drët defrënt, ala fin ora à perturbazions dal Mer Mediteran purtà truepa pluëia y nëif sun la montes. Chesc ie dantaldut unit a se l dé a sud dla Provinzia. Te truep luesc ie l dezëmber stat massa tume, la temperatures ie n generel restedes sëura la media di ani passei.

La cumpëida de desgrazies, morc y tei che se à fat mel tol ju. Tl ann 2002 iel suzedù 2.060 desgrazies, 1,4% demanco dal ann dant. Mendra fova nce la cumpëida generela de 2.665 persones che se à fat mel (-4,6%). N media fejel ora plu de set ferii al di. La cumpëida di morc sun streda ie caleda da 97 tl ann 2001 a 89 morc ntan l 2002.