Comunicat stampa

L istitut provinziel de statistica (ASTAT) a njenià n culaburazion cun l ufize per la furnadoies, na publicazion nueva sun la furnadoies tl Südtirol 2002. L se trata de na colezion de nfurmazions sun la strutures dla furnadoies, sun la cunzessions dla furnadoies y dla bilanzes.

OSP – Ora per la cresta danter i chemuns del Mareo y Ampëz passa la ferata dal inuem simbolich „Tru dla Pesc“. Chësta via unirà giaurida n dumënia ai 14 de setëmber 2003 tl cërtl de na pitla festa pra la utia Gran Fanes. Duc i nteressei avrà n dumënia nce l’ucajion de fé la via fereda cumpaniei da n mëinacrëp. Per chësta ucajion val debujën de se lascé nuté su nchin a n vënderdi ai 12 de setëmber.

OSP – Cun cuntribuc de ressanamënt de 464.000 Euro sustën l assessorat per artejanat, cumerz y tuism l mantenimënt de troies y uties da mont tl Südtirol. A usufrì de chisc cuntribuc ie la lies da mont AVS y CAI. Chësc iel unì dat pro n dal guviërn provinziel sun pruposta l assessëur cumpetënt.

OSP – Nfurmazions de utl sun la frumazion profesciunela de rujeneda ladina y tudëscia vën presentedes da n sada, 13 de setëmber 2003 sun l stond dla ripartizion per la frumazion profesciunela ladina y tudëscia dla 56esma fiera nternaziunela da d’autonn a Bulsan. Tl zënter dla presentazion sarà la scoles profesciuneles cun si vela de ufertes defrëntes. Sun l program iel pona nce de plu uneranzes per cursc dla frumazion profesciunela ladina y tudëscia. Ai 21 se presenta la scola profesciunela per l atejanat artistich de Gherdëina.

OSP - „L forum per lëures publcs“ à n lunesc ai 8 de setëmber a Bulsan metù man cun si lëur. L cumité de 22 persones tën n cuntrol sun i lëures publics tl Südtirol, porta prupostes y pusciblteies de miuramënc, y fej nce la nterpretazion dla normatives che vën metudes dant. Pra la senteda de n lunesc iel unì dat pro l regulamënt intern che mostra su avisa la cumpetënzes.

OSP – Cun gran maruëia à l assessorat per la scola y cultura ladina tëut a cunescënza che tres i media ti iel unì trat dant che l ne ti uniss’ nia dat n cuntribut culturel a n media ladin nce sce l ie n bensté de l dé da pert dla consulta ladina. L assessorat provinziel lecorda che l bensté dla consulta ladina ne ie nia ublient, che l guviern provinziel tol la decijions sun i cuntribuc provinziei y che la dumandes possa nce unides cialedes do plu avisa.

OSP – L resta me plu puecia enes de tëmp per i sculeies dla scoles d’ert y scoles secunderes dl II. livel per dé jù la dumandes de cuntribuc ala Provizia per l ann de scola 2003/04. L ultim di sarà juebia ai 2 de utober 2003. La dumandes possa unides dates jù te scola o tl ufize provinziel per sustëni scolastich.

OSP - Cun l Di dla Scola Ladina a S.Lenert de Badia à n vënderdi, 5 de setëmber metù man l ann de scola nuef per respunsabli, nsenianc, y culaburadëures dla scoles ladines. L assessëur per la scola y cultura ladina Florian Mussner à purtà dant nuviteies tl ciamp dla scola, ti à dat esprescion ala stima per l lëur di culaburadëures tla scola y ti mbincian truepa forzes per l ann nuef. Do la rujenedes dl ntendënt ala scola ladina Roland Verra, à l prof. Franco Frabboni purtà dant n referat.

OSP – Per la presënza tl internet de fitamajons dl Südtirol iel mo da giapé n sustëni dala Provinzia de Bulsan. L’azion dl assessorat per artejanat, cumerz y turism de sustenì la presënza tl internet de fitamajons à bele abù suzes y vën sën mo slungeda nchin ala fin dl ann. “L’azion internet dëssa ti judé ai fitamajons privac de fé l var tla re mundiela y ti judé a se presenté a na maniera moderna” sorissea l assessëur al cumerz Werner Frick.

OSP – I unicac fai tl lën dla nona fiera dla scultura “Unika” a Runcadic ie da udëi da n juebia ai 4 de setëmber dala 18.00 inant canche l unirà tenì la giaurida cun la presënza dl presidënt Luis Durnwalder, l assessëur per l artejanat Werner Frick y i rapresentanc di artejans. Feter 30 artisc mët ora si lëures fai esclusivamënter a man, che sarà da udëi nchin a n dumënia 7 de setëmber tl zënter dal tennis trasfurmà te na berstot d’ert.