Comunicat stampa

OSP - Ruvon for plu daujin ala data dla veles dl cunsëi provinziel: la dumënia ai 26 de utober 2003. Duc i particuleresc y la nfurmazions mpurtantes sun la veles possen sën liejer do tla trëi rujenedes provinzieles tla plates dl internet dla Provinzia. Tlo pudran do la veles nce cialé do duc i resultac.

OSP – Na lingia de proiec ie unic tëui tres dala cumiscion per la scunanza dl ambient a Bulsan. Danter chisc nce la streda „Sotrù-Oies“ tl Chemun de Badia y l troi sun Bulacia.

OSP – I cursc che vën pitei danter setëmber 2003 y jené 2004 ie sën da cialé do tla edizion nueva dl liber dai cursc „Zeit für Weiterbildung“. La nuvità da chëst iede ie la „plates de ult“ che dà nfurmazion sun plates tl internet, banches dati, y publicazions tl ciamp dl’istruzion y che dëssa dé urientamënt tla gran vela de cursc y seminares tl Südtirol.

OSP - Sculeies de ublianza, studënc de scoles autes, chëi che fej cursc prufesciunei a tëmp plënn tla scoles per lëur da paur y per l tenì cësa, nsci sciche studënc universiteres possa per l ann de scola che à da unì damandé n cuntribut dala Provinzia. "Nchinamo iel unì dat ju 4.705 dumandes", dij l’assessëura ala furmazion Sabina Kasslatter Mur. Aldò dla scoles vel dates defrëntes per de jú chësta dumandes. Tla proscima enes possa la dumandes unides dates ju tl’ufize pruvinziel per assistënza scolastica a Bulsan.

Bën 25 sortes de pitli mamifri de nosc raions possa l Museum dla Natura de Bulsan mustrè su dal ann 1995. La talpines, la surices de de plu razes y mo d’autri tieres possa uni vijitei ala lergia pra na escurscion ai 22 de agost a Andrian. N possa mo se nuté su nchin ai 19 de agost 2003 per chësta jita.

A duc i culaburadëures tl ciamp soziel che ulëssa miuré la cualità y motivazion de si lëur ti vëniel ai 2 y 3 de utober 2003 pità a Persenon n curs da pert dl servisc povinziel per l personal dl ufize per l soziel. I nteressei possa mo se lascé nute sù nchin ai 2 de setëmber 2003.

L juni 2003 ie stat l plu ciaut da canche l ie unì scrit su la temperatures tl Südtirol. Dal scumenciamënt nchin ala fin dl mëns fovel feter for bel tëmp cun truepa ëures de surëdl. Pluët al me n ucajion de vel temporal y perchël fova la plueia drët desfrënta ti luesc.

La cumpëida de sculeies tla scoles elementeres y mesanes dla valedes ladines ie aumenteda. N dut saral chëst ann 3.150 sculeies. „D’autonn saral tla scoles elementeres y mesanes de Gherdëina y dla Val Badia 70 sculeies de plu, se ncunforta l assessëur ladin Florian Mussner.

„L dessa vester n duvier de duc i guvierns dl mond, chël de anjenië ca bën i jëuni al mond dl lëur“, chësc se damanda i trëi assessëures ala furmazion Luisa Gnecchi, Sabina Kasslatter Mur y Florian Mussner n ucajion dl di mundiel di jëuni, n merdi ai 12 de agost 2003. For plu jëuni sun dut l mond ie zënza lëur, nsci dij l scrivan generel dla UNO Kofi Annan per l di mundiel di jëuni. „La globalisazion y la tecnica che ie for n evoluzion porta pusciblteies de lëur nueves y se damanda nce for deplù dai jëuni“ nsci i assessëures ala furmazion. Na bona furmazion y preparazion al mestier dessa anjenië jënt jëuna al mond dl lëur, sorissea Gnecchi, Kasslatter Mur y Mussner.

Dut cie che ie nteressant a savëi sun l proiet „assegurazion de cura“ tl Südtirol ie da sën nce da abiné tl internet. Do che n à bele publicà y spartì ora l cudejel de nfurmazion dal titul „Gutes Gefühl - Die Pflegeversicherung des Landes Südtirol“, possa la jënt sën nce cialé do plu avisa duc i particuleresc sun chësc proiet sun la plates tl internet.