Comunicat stampa

Usp – La Cumiscion tecnica dla Provinzia à dat pro l proiet de mascima per la Cësa di studënc a Urtijëi. Tl’ultima senteda da inier lunesc iel unit dat prò de ji inant cun la proietazion esecutiva per chësc frabicat tla streda Sotria, dlongia la Scola d’Ert a Urtijëi.

De dezëmber 2003 iel unì cumpedà 17,1% de plu fulestieres che ie ruvei da nuef y 10,5% de plu pra la cumpëida dla nuetes permez a dezëmer dal ann dant. L ann 2003 ie stat n ann drët positif: permez al 2002 iel unì arjont n aumënt de 4,6% pra la cumpëida di fulestieres che ie unic adalerc. Pra la nuëtes che i turisc’ ie stai tl Südtirol iel uni arjont n aumënt de 1,5%, y la majera cumpëida che l ne ie mei unì arjont.

Usp – La detlarazion de guviern presenteda de dezëmber te Cunsëi Provinziel y l program de coalizion danter la Südtiroler Volkspartei, "Pace e Diritti - Frieden und Gerechtigkeit" y "Unione Autonomista" ie sën da liejer do te n cudejel aposta. L Ufize de stampa dla Provinzia à dat ora n cudejel de 50 plates che ti vën madà debant a duc i abunei ala zaita dla Provinzia "Das Land Südtirol". Chësta edizion speziela ie nce da giapé tl Ufize stampa a Bulsan.

Tl’ena danter l 2 y l 6 de fauré vëniel dat l’ucajion de ji a rujené cun l aucat populer che tën udiënza te de plu luesc.

Usp – A defrënzia de duta l’autra pert dla Talia, muessa l liber de manutenzion per mplanc de sciaudamënt me unì tenì pra na capazità de 35 chilowatt nsù. Nsci vëniel fat al savëi dal ufize provinziel contra l meldefuech.

Usp – Da n lunesc possen tl ufize dl lëur dé ju dumandes de aprovazion per l lëur ntan la sajon y nce per tëmp indeterminà per zitadins da ora dl’Eropa. „Davia che l Südtirol posssa me ti dé da lëur a puëc per n tëmp indeterminà, iel te chësc cajo trueps che fej dumanda“, nsci l ditetëur dl Ufize provinziel per l lëur, Helmuth Sinn.

La cubatura tl Südtirol ie tl ann 2002 auzeda de +40,1% pra la frabiches nia abitatives y nce de 15,9% pra la cëses ulache l vën abità laite. L volum à rjont i 4.735.660 m3 per la frabiches nia abitatives y 2.010.344 m3 per la cëses abitatives. L volum dl lëures finei via ie stat de 4.180.996 m3 che fej ora n aumënt de 8,1 % permez al ann dant.

La populazion dl Südtirol cumpëida ala fin de setëmber 2003 470.195 persones y ie cresciuda permez al timester dant de 747 persones. Tl terzo timester 2003 à la cuota di nasciui arjont 11,7 nascites vives sun 1.000 abitanc. La cuota di morc fej ora 8,1 sun 1.000 abitanc. Ntan i mënsc de lugio, agost y setëmber 2003 se à maridà 604 per, de chisc l 49,0% te dlieja y i autri 51,0% n zevil.

Usp – Duta la nfurmazions sun l Forum per Lëures publics y si cumëmbri ie sën nce tl internet sun la plates dla Provinzia. I cumpunënc de chësc Forum per Lëures publics ie unic numinei ntan l ultim instà, la nceria da presidënt à sëurantëut l Assessëur ai lëures publics Florian Mussner. Di duvieres dl Forum fej nce pert l mëter jù de linies per la nterpretazion y l mëter n drova dla normes ududes dant per i lëures publics tl Südtirol.

L vën lecurdà che l 2 de fauré ie l ultim di per dé jù la dumandes de cuntribuc per la cultura ladina per l ann 2004.