Comunicat stampa

USP- Annegret Vescoli ie l’aministradëura nueva dla Lia di mëinacrëp y mëinaschi dl Südtirol. Deberieda cun l presidënt Othmar Prinoth se ala ancuntà cun l assessëur per l alpinism Werner Frick, l diretëur de ufize Hansi Felder y l diretëur de ripartizion Florian Zerzer.

USP – Tl Ufize Provinziel per Seniores y Servijes Soziei iel da garat na stiera da diretëur/diretëura. L cuncors ie bele unì scrit ora y la dumandes possa unides dates jù nchin ai 17 de dezëmber.

USP – Ala dumanda co che n possa schivé azions de viulënza uniral dat resposta ai 12 de nuvëmber pra n cunvëni a Burnech. Te chësta ucajion uniral dat n majer pëis al cunliamënt danter viulënza y raporc. Ala manifestazion nvieia la Ntendënza ala Scola Tudëscia, i Sevijes soziei dal Comunità raionela de Puster, l Servisc per malaties de dependënza, l zënter culturel y di jëuni UFO y la Cësa-INSO de San Laurënz. Diretëures, maestres dla scolina, nsenianc, culaburadëures di Sevijes soziei y saniteres, ma sambën nce chëi che lëura cun jëuni y assessëures ai jëuni ie nviëi.

USP – Te si ultima senteda à l Guviern Provinziel tratà 120 ponc al orden dl di. Danter chisc nce la regulamentazion per la streda sun Mont de Sëuc, l tunel dl Prëner y la cumposizion dl Guviern Provinziel nuef.

OSP – A passa 20 proiec ti iel unì cialà tl’ultima senteda dla cumiscion per l mpat ambientel. Danter chisc nen fovel nce doi tl Chemun de Sëlva, un sun Daunëi y l’auter per l purtoi dai schi „Cir“.

OSP – Sibe per l servisc zevil de ublianza che nce per l servisc zevil ulenter possen da sën se nfurmé tres la nueva plates tl internet. L Ufize per l servisc zevil a njenià sota www.provinz.bz.it/zivildienst la nfurmazions de utl, i formulares y la lista dla istituzions. Chësta nfurmazions ie nce da liejer do tla rujeneda ladina.

Tl’ena danter l 10 y l 14 de nuvëmber an inó l’ucajion de ji a rujené cun l aucat populer che tën udiënza te plu luesc.

OSP – Sun l arsen tl’ega da bever, i valores dla normativa nueva che va ndrova ai 25 de dezëmber y la scuviertes scentifiches te cuestions de sanità y tratamënt dl’ega se traterala ai 14 de nuvëmber pra n cunvëni dla Ripartizion Provinziela per la sanità, ega y ernergia.

OSP – 12 uties da mont giapa cuntribuc dala Provinzia de Bulsan per lëures de miuramënt y ngrandimënt de si locai. Sun nteressamët dl assessëur per cuestions alpines Werner Frick, à l Guviern Provinziel dat prò cuntribuc de ndut 450.000 Euro a cater uties da mont privates y a ot uties da mont dl CAI, l Club Alpino Italiano.

OSP - Di 249 nsenianc tla scoles ladines dla Provinzia de Bulsan, ne à 52 ncuei juebia ai 30 de utober, nia laurà fajan pea la protesta generela. La perzetuela che à fat pea a chësc scioper ie de 18 percënt.