Comunicat stampa

USP – Ala populazion de S. Crestina ti stà a cuer la valorisazion dl zënter dl luech y à fat pea a gran cumpëida la nrescida sun i bujëns, pertes stersces y dëibles dla streda Dursan. La respostes plu tleres dla populazion reverda l bujën de fé n raion da jì a pe ulache la jënt possa se ancunté.

USP – Danter Puntives y Urtijëi vëniel te plu lueges fat l asfalt da nuef. L Servisc provinziel ala Stredes fej sun feter 5 chilometri de plu ntervënc per cumedé ca l asfalt che fova unì ruinà dassënn dal gran muvimënt ntan l inviern.

USP – Per sustenì la cooperatives te tëmps de crisa economica y finanziera, à la Jonta provinziela, inier 10 de mei adatà i criteries de sustëni aldò la pruposta dl assessëur Bizzo. Da moinla puderal unì paià na pert danora di cuntribuc y nce rates de contes parzieles.

USP – La campania nueva per la segurëza sun streda ie n proiet de prevenzion y sensibilisazion do n cunzet generel cun placac sun streda y azions te scola y tl zënter de segurëza provinziel. La campania cun l slogan positif „Life is beautiful“ ie unida prejenteda ncuei, 11 de mei, a Bulsan.

USP – Duman 12 de mei vëniel sun la streda de Ciaulonch scumencià lëures per mëter ju asfalt da nuef. I lëures ie udui dant nchin ai 18 de mei. Ntan che l vën laurà, puderà l muvimënt de streda passé sun mesa larghëza de streda.

USP – Na cumiscion tecnica metuda su ncuei dala Jonta provinziela, dëssa lauré ora soluzions per arjonjer la cëses ti mëndri luesc cun l internet debota. L sistem de graudatories per nsenianc de scola dëssa unì unificà danter la trëi grupes de rujeneda. Chisc ie stai i argumënc de majer nteres prejentei ncuei, 10 de mei, ai media do la senteda dla Jonta provinziela.

USP – Ncuei, 10 de mei vëniel tl tunel dl stradon de Gherdëina a Urtijëi scumencià lëures de ressanamënt. Per l prim iede uniral adurvà na maniera ecologica de cumedé ca i parëies dl tunel che tol nce su i gas de descëria. Ntan i lëures, che ie udui dant nchin ala fin de juni, saral mesun passé sun mesa larghëza de streda.

USP – Tla provinzia de Bulsan possen sën udëi programs de televijion ORF1, ORF2 y ZDF te cualità HD. Tla sënta dla Radiotelevijion-Azienda per l Südtirol RAS à l presidënt dla Provinzia Durnwalder ncuei, 6 de mei, mpià la trasmiscion sun tiera de chisc programs a na maniera che n possa i udëi te na mieur’ cualità. L’assessëura Kasslatter Mur à mpià la trasmiscion-RAS de trëi programs nueves da oradecà: ARTE, SRG La1 y 3Sat.

USP – Sun la stradon de Gherdëina riesc dedite da Pruca ie ncuei (5 mei) unì ju sasc. N majer sas à sfurzà i respunsabli dla stredes de saré la streda per pudëi l rumé demez. L ie udù dant de giaurì mo ncuei l stradon per la 5 domesdì.

USP – Na mostra de fotografies, films y cunferënzes sun argumënc alpins prejënta la Comunità di paejes alpins Arge Alp pra l festival dl chino da mont a Salzburg. Fotografs amatoriei y chiche fej filmes per hobby possa mandé ite si lëures al Ufize stampa dla Provinzia de Bulsan, per i lascé udëi a Salzburg.