Comunicat stampa

USP – Nchin ai 11 de merz à artisc’ dla valedes ladines mo dl’aurela per fé pea i cuncorsc scric ora dal Museum Ladin Ciastel de Tor. L pest dunà da Richard Agreiter ie scrit ora per scultëures tl Tirol storich cun la valedes ladines dla Dolomites. Ala Trienala Ladina tl Museum Ladin possa fé pea atisc’ ladins dla Dolomites, di Grijons y dl Friul.

USP – A Berlin y Chambèry tla Franzia à i assessëures provinziei Mussner, Widmann, Laimer, Bizzo y Kasslatter Mur vijità i parcs tla tecnologia. La prima mprescion che la delegazion dla Jonta provinziela à tëut pea ie che l va debujën de n cunzet generel per l zënter de inuvazion y tecnologia che n uel fé a Bulsan sud.

USP – La normes dl’Europa per l’ega vëija dant che uni raion anjenië n plann de gestion dl’ega. L plann per l’Elpes urienteles ie unì dat pro ncuei (24 fauré) a Roma. “Per nëus se tratovela de ntegré nosc plann de gestion provinziel” à dit l assessëur Florian Mussner, che à ncuei reprejentà la Provinzia de Bulsan a Roma.

USP - Cun la dificulteies dl mparé, n problem che reverda truep sculeies, se à ncuei (24 fauré) dat ju feter 350 nsenianc y respunsabli de scoles, psicologhes y educadëures. Pra la giaurida dl cunvëni metù a jì dala ntendënza tudëscia, à l assessëura Kasslatter Mur sorissà che la scoles autonomes à i mesuns per lauré sun chisc problems tres la ntegrazion.

USP – Chiche lëura tl artejanat, ndustria, cumerz o tl turism, ma nce chiche à perdù l lëur o ie tla situazion de mubilità, possa damandé n cuntribut provinziel per se istruì inant tl ciamp dl lëur. La repartizion provinziela per la furmazion prufesciunela dà ora nchin a 1.500 euro. I cuntribuc vën dai ora nchin a despunibltà de scioldi.

USP – I presidënc dla cunsultes provinzieles di sculeies se à ancuntà a Roma per n barat cun cun coleghes d’autra regions. Lena Mulser de Urtijëi à reprejentà i sculeies ladins.

USP - L 20esim secul à tucà particularmënter i ladins, sibe la persones che nce la cumenanza. La prima viera mundiela à purtà batalies sun la dolomites, l fascism à spartì i ladins y la catastrofa dl’opzion à purtà melcuntentëza y desperazion. Ala jënt ladina ntan chësc secul iel dedicà n nuef film documenter. L Presidënt Durnwalder y l assessëur ladin Mussner nvieia ala premiera ai 4 de merz a Bulsan.

USP – La Provinzia de Bulsan fajerà nvestimënc per 95 milion de euro per frabiché stredes y puenc ntan l ann 2010. La Jonta provinziela à ncuei (22 fauré) dat pro l program aldò. Danter i argumënc de majera mpurtanza che l Presidënt à prejentà do la senteda iel problems de finanziamënt dl tunel dl prëner y l miuramënt dla segonda rujenedes da pert de sculeies.

USP – Avisa 200 ani da canche Andreas Hofer fova unì stlupetà, iel ai 20 de fauré a Mantova unì finà via ufizialmënter l ann de cumemorazion. “On purvà a nterpreté la storia, a fé ancunté i populi y a dé plu forza ala culaburazion sëura i cunfins” à dit l Presidënt dla Provinzia de Bulsan Luis Durnwalder a Mantova.

USP – „L di nternaziunel dla rujeneda dl’oma, dumënia ai 21 de fauré pieta ucajion per fé na reflescion sun l valor y senificat dla rujeneda ladina per cialé inant pian via da nosta identità y cultura“ nsci l assessëur provinziel ladin Florian Mussner che tol posizion al di nternaziunel fajan referimënt ala valorisazion, l respet, la tradizion y la legrëza per la rujeneda ladina.