Comunicat stampa

USP - Genitores possa mo nchin ai prim de fauré scrì ite si mutons y mutans ala scoles de ublianza per l ann de scola che vën. Davia che l 31 de jené ie de dumënia, vel l lunesc sciche ultimo di per la iscrizions ala scoles elementeres y mesanes tla valedes ladines. L’iscrizions ala scoles autes te Gherdëina y tla Val Badia possa unì fates nchin ai 31 de merz.

L’età media di jëuni sëura 18 ani che vif dai genitori ie auzeda a 28,2 ani (2007) permez ai 25,1 ani tl ann 1990. I mutons se n va plu tert da cësa permez ala mutans. I lëures de cësa y l’educazion di mëndri vën daniëura udui sciche cossa dl’ëiles. Tl ann 2006 iel di ëi danter 41 y 50 ani stat 8,4% che a damandà de sté ora dl lëur per paternità, di ëi danter 51 y 60 ani iel me stat 2,8%. La perzentuela de chëi che porta a cësa n davani ie pra i ëi cun 80% plu auta, permez al’ëiles cun 60%. Chëstes ie me n valguna dla nfurmazions che ie publichedes sun l cudejel „Haushalte in Südtirol“, dat ora chisc dis dai Istitut provinziel de statistica (ASTAT).

USP – 65 ani do la fin dl Olocaust ne possa nia sfanté l lecort al massacher di judieres, nemics militeres y politics ti lager nazisc’. “I testemonesc che à mussu fé pea chëi tëmps de grandiscimi patimënc vën do y do a mancë, ma si arpejon muessa unì tenida n vita” nsci l presidënt dla provinzia Durnwalder per l di de lecort al Olocaust (duman) ai 27 de jené.

USP – L assessëur provinziel ala sanità, l primar dl servisc de trasfujion y presidënc dl Avis à ncuei danmesdì (26 jené) nvià la populazion a duné sanch. Aldò dl program dl sanch iel tla provinzia de Bulsan chëst ann debujën de 26.000 uniteies de sanch. Davia che l bujën devënta for majer iel nce for inò debujën de dunadëures nueves.

USP – La njonta de paiamënt per adurvé la rujeneda ladina te stieres publiches che la Jonta provinziela à dat pro ncuei, 25 de jené, reverda i ladins che à l ejam de rujeneda. “A chësta maniera ulons sustenì duc i culaburadëures ladins tla Provinzia, valorisan tl medemo mumënt identità ladina” spiega l assessëur Florian Mussner.

USP – I ufizies provinziei per la scola y cultura ladina ie n merdi y mierculdi 26 y 27 de jené 2010 sarei ntan dut l di.

USP – La Jonta provinziela de Bulsan à ncuei dat pro che culaburadëures dl’aministrazions publiches che adrova la rujeneda ladina dëssa giapé na njonta tl paiamënt. Tla senteda da ncuei (25 jené) ne à nia plu tëut pert l assessëura Barbara Repetto ajache la Suneria de cassazion à detlarà che la ne ëssa nia pudù se mëter sun lista per l Cunsëi provinziel.

USP – Merdi ai 26 de jené uniral publicà sun la gazëta ufiziela regiunela la doi leges provinzieles nueves omnibus: una vën tlameda lege omnibus soziela, l’autra omnibus dl ambient.

USP – Per l terzo titul europeich de jadiné artistich à l presidënt dla Provinzia Durnwalder mandà auguresc a Carolina Kostner. “Kostner arjonc for inò bedaies y ie n ambasciadëura per l Südtirol” nsci l presidënt dla Provinzia, che vëij tl’atleta de Urtijëi n ejëmpl per chël che n possa arjonjer cun talënt y lezitënza.

USP – La crisa economica mundiela à tla provinzia de Bulsan me tucà vel ciamps, dantaprima l frabiché y la laurazion. Chësc vën mustrà su dala nrescides che l Servisc provinziel de usservazion dl marcià dl lëur à fat ntan l instà y auton dl ann passà. Chisc dac ie publichei tl’edizion nueva de "Arbeitsmarkt News".