Comunicat stampa

USP – Ncuei, 9 de nuvëmber ie n di storich per la trasmiscion televisiva te Gherdëina y tla Val Badia. I lëures per destudé ju l signal analogh y fé jì la trasmiscion digitela ie jic bën. La populazion ladina possa de ncuei giapé na majera vela de programs dla televijion y leprò te na miëur cualità.

USP – La Repartizion ala Cultura ladina dla Provinzia de Bulsan ova metù a jì n cuncors per artisc’ dla valedes ladines. N vënderdi ai 20 de nuvëmber sëuradajerà l assessëur provinziel ladin Mussner l pest provinziel per artisc’ ladins tla Galaria Prisma a Bulsan. Te chësta ucajion vëniel nce giaurì la mostra.

USP – Te si senteda da (ncuei) 9 de nuvëmber ie la Jonta provinziela stata a una che la rujeneda ladina muessa nce unì adurveda pra i referendum. Sun pruposta dl assessëur Mussner unirà chësc udù dant tla lege nueva sun l referendum. I crisc’ te scola, la feries sun i luesc da paur, la defendura dl ambient y l’energia danter provinzia y chemuns ie stai i argumënc prinzipei che l presidënt Durnwalder à prejentà te cunferënza stampa.

USP – La cunsultes provinzieles ai jëuni dla trëi grupes de rujeneda se anconta n iede al ann per na senteda cun duc deberieda per se baraté ora n cont de argumënc prinzipei dl’atività, manieres de lëur y fins da arjonjer. Da permò ie unì tenì chësta senteda a Persenon.

USP – Per l sëurandé dla cuotes dal lat à la repartizion provinziela per l lëur da paur vel nuvità. Per pudëi mantenì la cuotes saral me pu debujën de avëi l 85% mpede 90% sciche l ie stat nchin sën. Sciche basa dla dumandes vel i dac dl sistem de nfurmazion per lëur da paur LAFIS. Ncuei, 9 de nuvëmber vëniel tla Val Badia scumencià a pië do la dumandes sun l post.

USP – La streda provinziela sun l Ju de Börz ie da ncuei, 6 nuvëmber s’areda per l inviern. Da San Martin possen mpomo furné nchin sun Börz.

USP – La streda danter Pruca y Ciastel vën da n lunesc 9 de nuvëmber sareda davia che l muessa unì fat lëures. Nchin ai 13 de nuvëmber uniral segurà i parëies sun i ëures dla streda y perchël muessen fé cont che l sarà da aspité nchin a 30 menuc.

USP – Da moinla dëssel unì curà de plu i proiec che tol ite duta la grupes de rujeneda. Chësc ie unit ora n juebia (5 nuvëmber) dal’ancunteda danter i assessëures ai jëuni Mussner, Kasslatter Mur y Tommasini cun i presidënc dla trëi cunsultes ai jëuni Peer, Stuflesser y Lazzarini. Sciche argumënt dl ann ie unì cris ora l fé pea di jëuni tl ciamp dla furmazion.

USP - Sciche ciavalier, uem dl’aventura y ël de vita iel jit ncantëur tl mond dl medieve, sciche cianzunier se al pona fat gran inuem: Oswald von Wolkenstein. Chisc dis vëniel tl Ciastel Tirol, sëura Maran tenì n simposium cun esperc de inuem nternaziunel sun Oswald von Wolkenstein. N sada ai 7 de nuvëmber uniral tratà l raport danter l poet cunesciù y la Ladinia.

USP – N lunesc che vën, ai 9 de nuvëmber scumëncia te Gherdëina y tla Val Badia l tëmp dla televijion digitela. La mudazion de trasmiscion dal sistem analogh al sistem digital tla Provinzia de Bulsan ie ntan la prima ena jit avisa do program. Nsci puderà nce unì tenì ite la data prugrameda per luesc ladins.