Comunicat stampa

USP – La streda de zircunvalazion de S.Crestina ova messù unì sareda per pudëi finé de plu lëures. Duman da sëira, vënderdi 09 de utober unirà la streda inò giaurida. Plu abenëura che calculà danora puderan inò astilé ora l zënter dl luech y passé sun la zircunvalazion nueva.

USP - Le punt nü che liëia le comun da Corvara ala fraziun da Colfosch gnarà daurì ofizialmënter en vëndres ai 16 de otober dl 2009 dales 2 domisdé. I laûrs é gnüs fac dal Assessorat provinzial ai laûrs publics en colaboraziun cun le comun da Corvara. Al ne se trata nia ma dla costruziun de n punt, mo ince de n sotpassaje y n marciapîsc.

USP – Nchin a merdi, 3 de nuvëmber à studënc mo la puscibltà de damandé borses de studi, che l ti vënie paià de reviers l’imatriculazion y che l ti vënie dat n cumpëns per i viages. Per l prim iede vëniel chëst ann nce rembursà l’iscrizions sota 500 Euro.

USP – Davia che tla cësa di studënc a Urtijëi fovel l ann passà unì aumentà la cumpëida di liec, iel ntan chësc instà nce unì ngrandì la mensa. La gran dumanda do lueges tla cësa “Assudëi” y l pudëi marendé desmostra che la strutura vën nuzeda mo deplù che n se ova aspità.

USP – “Assudëi Tibet”, a chësc moto ie dedicheda la sëira de n vënderdi 9 de utober tl Museum Ladin a San Martin de Tor. Tl cheder dla mostra “Sëura la montes tl viers dla libertà” saral la reghissera dl’Austria Maria Blumencron a prejenté dala 8 da sëira si liber dal titul "Auf Wiedersehen, Tibet". L ntreda ala sëira cun prejentazion multimedia ie debant.

USP – La data per i mplanc de segurëza ti hotiei ie unida spënta de n ann. Doi universiteies nciariedes à analisà la dumandes dl referendum n cont dla cumpatibltà cun la costituzion. Per la senteda dla trëi jontes provinzieles de Trënt, Bulsan y dl Lond Tirol ai 15 de utober, iel unì dat pro l orden dl di. Chisc ie stai i argumënc de majer nteres prejentei ncuei (5 utober) dal presidënt dla provinzia Luis Durnwalder do la senteda la Jonta.

USP – Dal 28 de utober nchin ai 11 de nuvëmber uniral tla Provinzia de Bulsan, n var al iede destudà ju la televijion analoga y mandà ora l signal digital. Deberieda cun l vizeminister talian ala comunicazion Paolo Romani à l presidënt dla provinzia Luis Durnwalder dat l scì per scumencé cun la mudazion.

USP – L cunzet dla libertà ie n vënderdi domesdì, 2 de utober, stat argumënt zentrel dl Di dla Cultura ladina. L Assessorat provinziel ala Cultura Ladina à chëst ann nvià a San Martin de Tor y à cun l argumënt dla libertà fat referimënt al ann de cumemorazion 1809-2009. N cont dl Cuer de Gejù, i ladins tla batalies de liberazion y cun na mëisa de descuscion sun l valor dla libertà ncuei, à na sala plëina de jënt pudù jì plu sot tl’idea dla libertà te n tëmp che se muda.

USP – N cont de lauranc autonomes che lëura mpomo sota patron, à l servisc de usservazion dl marcià dl lëur prejentà prima zifres ufizieles. “Nchinamo ie unì fat nrescides sun la cualità n chësc cont, ma n cont de cumpëides ne fovel mo mei unì cialà plu avisa” dij l’assessëura Barbara Repetto.

USP – La streda de zircunvalazion de S. Crestina resta mo sareda per diesc dis per pudëi finé de plu lëures. L muvimënt di auti puderà la dumënia ai 11 de utober inò passé sun i 1.679 metri de streda nueva y tres i doi tuniei.