Comunicat stampa

USP - Philipp Messner de Urtijëi y Giancarlo Lamonaca de S.Martin de Tor à venciù l pest scrit ora dala Repartizion ala Cultura ladina dla Provinzia de Bulsan. Na bela cumpëida de artisc’ à fat pea l cuncors per ladins de duta cin valedes ladines. A 11 artisc’ ti vëniel d’autonn dat la puscibltà de mëter ora si opres tla Galaria Prisma a Bulsan.

USP - L Cunsëi Naziunel dla Publica Istruzion a Roma à n lunesc (22 juni) dat pro la Ndicazions Provinzieles per la Scoles elementeres y mesanes ladines. Do passa 20 ani, porta la ndicazions inuvazion di cuntenuc y dla metodologies dl mparé per la scola ladina. La majera nuvità che jirà n dorva de setëmber cun l ann de scola nuef, reverda la scola elementera cun n’ëura de nseniamënt de plu.

USP – Pra l luech Happacher che fej pert dla scola auta per lëur da paur a Auer vëniel fat su na stala didatica. Deberieda cun l Presidënt dla Provinzia Durnwalder y l assessëur Mussner iel n mierculdi (24 juni) unì festejà la colm.

L’ena che vën, dai 29 de juni ai 3 de lugio, tën l aucat populer udienzes te de pu luesc. A Urtijëi sarala n juebia 2 de lugio.

USP – Duman, 25 juni, scumëncia nce tla scoles autes dla valedes ladines la matrua. Cun 60 candidac, iel chëst ann 28% de plu sculeies permez al ann passà che fej l ejam. „Ti mbince dut l bon ala sculees y ai sculeies per chësc ejam mpurtant“ nsci l assessëur ladin Florian Mussner che se ncunforta dl aumënt dla cumpëida de maturanc a Urtijëi y a La Ila.

USP – Cun na jita per udëi i uciei à 15 mutons y mutans scumencià l curs de furmazion per deventé „Junior Ranger“. L Ufize provinziel per i Parcs Naturei deberieda cun i jëuni dla Lia da Mont (AVS) à nvià via l cunzet dl „Junior Ranger“ per mutivé i jëuni per la natura, rafurzé si liam cun la cuntreda y i fé deventé pasciunei de natura.

USP – Tla scora elementara Jepele Frontull a La Pli él gnü realisé n film dal titul “Les stries y la maza strinada”. I scolars é deventà protagonisc’ de n film de 20 menüc che tol ite aspec dla storia dl paîsc y olache ai po adorè le lingaz dla uma. L film gnarà ince presentè pro festivals internazionai.

USP – La Provinzies de Bulsan y Trënt uel purté inant deberieda inuvazions tl ciamp dl’energia alternativa, frabiché cuatieres tl respet dl ambient y mubilità da sustenì tl daunì. Sun pruposta dl’assessëura Barbara Repetto à la Jonta Provinziela de Bulsan n lunesc (22 juni) dat pro n’acurdanza.

USP – L Cumisser dl’Europa per l’energia Andris Piebalgs ie ncuei (22 juni) unì a Bulsan per cialé plu da daujin co che l vën laurà tla Provinzia de Bulsan n cont de energia alternativa. Da chësta vijites portel mpulsc nueves a Brüssel per lauré ora diretives europees n cont dl’energia alternativa. “Südtirol ie un di raions plu svilupei n cont de energia alternativa."

Usp – La Jonta provinziela de Bulsan à ncuei (22 juni) tëut tres mudazions ala plann provinziel di purtoies dai schi. La prupostes da Frea a Colfosch y da Piculin de viers de Al Plan ne ie nia unides azetedes. L presidënt Durnwalder à do la senteda prejentà ponc de majer nteres, danter chisc nce l nseniamënt dla rujenedes tl Südtirol.