Comunicat stampa

USP – Passa 43.000 parzeles te 15 chemuns cun passa 76.000 nserzions iel ntan i ultimi ani unì fat tl Ufize dl Liber fundier a Tluses. L assessëur Hans Berger à ncuei (16 juni) ufizialmënter stlut ju l’era di libri grosc a Tluses y nvià via l’era digitela. “A chësta maniera iel mesun ti ruvé permez plu riesc y cun manco burocrazia ala nfurmazions dl liber fundier, che ie sën nce plu avisa” à dit Berger.

USP – De utober fina l’era dla trasmiscion televisiva analogica. Cie che unirà do ie la televijion digitela mandeda ora per tiera. Ma cie ie pa veramënter l digitel sun tiera? Cie saral pa debujën per udëi la televijion? Co che funzionea pa n decoder? Chëstes ie me n valguna dla dumandes sun chëles che n giapa resposta sun la nueva plates internet www.provincia.bz.it/digitale-terrestre/ anjeniedes dala Provinzia de Bulsan, la RAS y la Informatica Alto Adige. La plates ie unides anjeniedes per nfurmé i zitadins dla mudazion dl sistem de televijion tl Südtirol ala fin de utober.

USP – Te n mëns, canche ai 16 de lugio uniral ufizialmënter giaurì la streda de zircunvalazion de S.Crestina scumëncia per si populazion n’era nueva. L muvimënt di auti unirà menà sun 1660 metri de streda nueva y tl zënter de S.Crestina miurerà dassënn la cualità de vita. A n mëns dala giaurida an bele scumencià a mëter ju l asfalt.

USP – L Cumisser dl’Europa per l Plurilinguism Leonhard Orban à dedicà na bela pert dla vijita tla Provinzia de Bulsan ala Ladinia. N lunesc domesdì (15 juni) al pra la vijita tl Museum Ladin a San Martin de Tor mustrà gran nteres per la realtà ladina cun si sistem de scola paritetica.

USP – Te n ancunteda danter l assessëur provinziel Florian Mussner y i diretëures dla scoles y scolines ladines iel unì metù sun mëisa i resultac de nrescides n cont dl livel de rujeneda, arjontes y problems de atualità. L assessëur Mussner se damanda plu culaburazion danter scola y istituzions cultureles.

USP – L cumisser dl’Europa per la mendranzes Orban à ncuei (15 juni) vijità la Jonta provinziela de Bulsan per mparé a cunëscer de prima persona co che l cunzet dl plurilinguism ie unì metù n drova tl Südtirol. Domesdì à l assessëur ladin Florian Mussner cumpanià l cumisser tla Ladinia.

USP – Fajan ressanamënc tlima dla cëses possen les auze de un n meter: chësc à la Jonta provinziela de Bulsan ncuei, 15 de juni dat pro te si senteda dl lunesc. I argumënc de majer nteres che ie unic prejentei te cunferënza stampa ie l recurs dl Guviern naziunel al bilanz provinziel, la pruposta de na reforma scolastica, scioldi nueves tl fond de rotazion y la reduzion de direzions dla scoles de mujiga.

USP – Ncuei, lunesc 15 de juni à metù man i ejams dla scoles mesanes. Tla valedes ladines iel de ndut 272 sculeies che fajerà chëst ena cater proves scrites y l’ena che vën mo la proves a usc per finé via la scola mesana.

USP – L Istitut Pedagogich ladin à scrit ora na stiera per l servisc de cunsulënza y sustëni al svilup scolastich. Nsenianc dla scoles elementeres, mesanes y autes dla valedes ladines possa fé pea l cuncors, fajan dumanda nchin ai 24 de juni. La stiera ie resserveda per nsenianc de rujeneda ladina.

USP – L stradon de Gherdëina, danter Maciaconi y La Poza tl Chemun de Sëlva, ie unì sarà al muvimënt di auti nchin ai 17 de juni.