Comunicat stampa

USP – Tenzin Gyatso, l 14esim Dalai Lama, la figura spirituela plu auta di tibetians, vën ai 16 y 17 de nuvëmber tl Südtirol. L Dalai Lama cunësc bele nosta provinzia, chësc ie l terzo iede che l vën tl Südtirol.

USP – L Ispetorat de Burnech fej de plu cuntroi ai motores da cross ti raions sota defendura. Me ti ultimi dis iel unì straufà sies iedesc. “I cuntroi vën fai ajache on giapà truepa lamënteles per via di motores da cross” spiega Silvester Regele, che mëina l Ispetorat dla forestela a Burnech. L problem reverda nce dassënn la Val Badia.

USP – “Pudonsa cun l aiut dla rujenedes arjonjer d’autra cultures o ie pa la defrënta rujenedes na sëida? Defrënta rujenedes cun defrënta mpurtanzes? Giaurì nosta identità à d’autra grupes de rujeneda?” N vënderdi ai 6 de nuvëmber dajerà i prufessëures Tullio De Mauro y Hans Goebel nce respostes a chësta dumandes. L Istitut Ladin „Micurà de Rü“ y l Assessorat provinziel ala Cultura Ladina nvieia dala 17.00 tl Palais Widmann a Bulsan.

USP – Duman 28 de utober vëniel tla Provinzia scumencià a destudé ju la trasmiscion televisiva analogica per ti fé lerch al sistem digitel. L prim raion reverda Bulsan, l Unterland y la val Sarentin. Chi che uel se nuzé di vantajes dla televijion digitela adrova n decoder, ntergà tla televijion o a pert y muessa crì da nuef i canai. Tla Val Badia y te Gherdëina saral dal 9 de nuvëmber da udëi la televijion digitela.

USP – Feter 516 milion de Euro destinea la Provinzia de Bulsan per finanzië i chemuns tl ann 2010. Chësta ie (ncuei) 27 de utober stata la basa dla tratatives danter la Provinzia cun si presidënt Durnwalder y reprejentanc dl Cunsorz di chemuns. N majer pëis à abù l bujën de judé pea a sparanië. Ai chemuns ladins uniral metù a desposizion 308.000 Euro per l lëur sëuraprò cun la trëi rujenedes.

USP – La Jonta provinziela à dat pro che pra la streda da Al Plan de Mareo nchin a La Plì vëniel fat lëures sëuraprò. Sun doi toc de chësta streda ie la Provinzia de Bulsan tl lëur de miuré la streda fajan nce prutezions de segurëza. De ndut iel udù dant n nvestimënt de 1,38 milion de Euro.

USP – La situazion mudeda di mëndri y dla families te nosc tëmps mpënia for deplù l’atività te scolina. Te n ancunteda cun l assessëur provinziel ladin Florian Mussner à reprejentantes dl personal pedagogich dla scolina tudëscia y ladina (LSKA) purtà dant ciunes che ie al mumënt la majera dificulteies per la educadësses per ti vester ala situazion.

USP – La Jonta provinziela de Bulsan à te si senteda de (ncuei) lunesc 26 de utober tëut a cunescënza i resultac di referendum dijan de ulëi se dé ju cun i argumënc nce sce la populazion ne à nia azetà a maiuranza la prupostes de lege. I argumënc plu mpurtanc ora dla senteda dla Jonta che l presidënt à prejentà ala stampa reverda l tunel de basa dl prëner y la pruposta de lege per imigrei.

USP – Ncuei danmesdì iel dala 12.00 unì finà de cumpedé ora la zedules di referendum de (inier) dumënia 25 de utober. La cumpëides de uni una dla 488 sezions de vela ie unides fates al savëi tres l sistem cun l BlackBarry.

USP – Da ncuei, lunesc 26 de utober, vëniel sarà la zircunvalazion de S. Crestina per pudëi mëter su i dlandri di doi majeri puenc. Per via de chisc lëures vën l muvimënt di auti avisà ora per cater enes, ntan la duta la 24 ëura, sun la vedla streda prinzipela de S.Crestina.