Comunicat stampa

USP – Tl proscimo ann de scola, de autonn 2010 uniral tla Scola d’Ert Cademia a Urtijëi giaurì na sezion de mujiga. Ncuei 23 de nuvëmber à scumencià n’ena de pratica per sculeies dla scola mesana che finerà via n sada 28 de nuvëmber cun n di dla porta davierta per duc. N sada uniral fat de plu prejentazions dla cumposizion “art-fish-music”.

USP - La Jonta provinziela de Bulsan à mudà la regules per cuntribuc ala lies turistics. A na maniera nueva dëssel nce unì dat ora i cuntribuc per chëi che ie jic a sté oradecà y vën a cësa per la veles. I criteries per mëndri lëures che ne se damanda nia na cunzescion da frabiché ie unic lascei do. Chisc ie stai i argumënc de majer nteres prejentei dal presidënt Durnwalder (ncuei) ai 23 de nuvëmber do la senteda dla Jonta provinziela.

USP – Tla Galaria Prisma de Bulsan iel da udëi l’opres de artisc’ ladins che à fat pea l cuncors scrit ora dala Repartizion ala Cultura ladina dla Provinzia de Bulsan. N vënderdi sëira (20 nuvëmber) iel unì giaurì chësta mostra n ucajion dla premiazion de Philipp Messner y Giancarlo Lamonaca che à venciù l pest per artisc’ ladins.

USP – 17 atlec dla Provinzia de Bulsan che à venciù bedaies pra campionac dl’Europa y dl Mont à (nseira) ai 17 de nuvëmber pudù pië do dal presidënt Durnwalder l’uneranza di sportivi. Cun ëi iel nce unì unerà 12 funziuneres che se à fat merit. L sëul reprejentant ladin danter i unerei ie l campion dl mont de luesa Florian Clara da S. Martin.

USP – “Air Alps” julerà nce tl daunì da Bulsan a Roma. La sozietà de jol à venciù l cuncors per la linea sustenida dala Provinzia de Bulsan. “Per l Südtirol sciche raion economich-turistich ie l culegamënt ala rë nternaziunela de joi de gran mpurtanza, per chësta rejon vëniel sustenì la linea Bulsan-Roma chiran nce mo d’autri culegamënc” à dit l assessëur Widmann.

USP – L Dalai Lama, la ncëira plu auta di budisc’ tibetians à ncuei (17 nuvëmber) ancuntà l presidënt dla Provinzia Durnwalder y pona nce duta la Jonta provinziela. Tl’ancunteda cun la stampa al mustrà gran recunescënza per la sensibltà y l sustëni da plu pertes tla Provinzia de Bulsan per si popul. “La China ie tl lëur de se mudé y n’autonomia sciche a Bulsan fossa per nëus na bona soluzion” à dit l Dalai Lama.

USP – La Jonta provinziela de Bulsan à fat ora l scumenciamënt y la fin dla sajons canche l ie debujën dl servisc dl Aiut Alpin. Dan tò na dezijion n cont dl daz sun i jëufs dla Dolomites uelen da pert de Bulsan audì l’autra provinzies nteressedes. Chisc ie stai i argumënc de majer nteres per la populazion ladina, prejentei (ncuei) 16 de nuvëmber dal presidënt Durnwalder do la senteda dla Jonta.

USP – Nce sce la va de sparanië, giaperà la jënt de tëmp nce n auter ann l abunamënt Abo60+ debant. Chësc reverda duc i zitadins dla Provinzia de Bulsan che n auter ann arjonj i 70 ani. Ëi possa se damandé l abunamënt per furnì debant cun i mesuns publics tres n formuler che ti vën chisc dis manda duc i nasciui l ann 1940.

USP – Cie ie pa l tisl nuef? Ciuldì ti vëniel pa dit l tisl di purciei? Co se tachen pa chësc tisl? Ciuni ie pa i sintoms? Co possen pa se defënder? La respostes a duta chësta dumandes possen giapé da n julantin dat ora dal Departimënt provinziel per la sanità che ie da giapé te de plu lueges.

Chëst ena, dai 16 ai 20 de nuvëmber, tën l aucat populer udienzes te de pu luesc. A S.Martin de Tor saral n vënderdi 20 de nuvëmber.