Comunicat stampa
Futurum, la fiera dla furmazion per duc
USP – Per l segondo iede vëniel a Bulsan metù a jì la gran fiera dla furmazion tla Provinzia de Bulsan. La fiera Futurum mostra dal 10 nchin ai 13 de dezëmber la gran vela de furmazion per i mëndri nchin ala jënt de tëmp de duta la trëi grupes de rujeneda. Ncuei (26 nuvëmber) iel unì prejentà Futurum te na cunferënza stampa.
1,3 milions per la Cultura ladina tl 2009
USP – La Cunsulta provinziela ladina se à ancuntà n mierculdi 25 de nuvëmber per tò tres l’ultima pert dla dumandes de cuntribuc per la cultura ladina da chëst ann. De ndut vëniel tl 2009 tres l Assessorat provinziel ladin judà cun 1.359.458 Euro a lies, artic’ y istituzions che lëura y mantën la cultura ladina. Per l ann che vën an bele dat pro prioriteies nueves.
Dlandri finei a S.Crestina: streda gëura ai 27 de nuvëmber
USP - La streda de zircunvalazion de S.Crestina ie unida stluta ntan l ultimo mëns per fé su i dlandri dl majer puent. L se trata de dlandri particuleres che ti dà ala streda nueva na nota architetonica. Cun l finé via de chisc lëures vën la streda n vënderdi domesdi, 27 de nuvëmber, inò giaurida al muvimënt di auti.
Mujiga tla Scola d’ert a Urtijëi: prejentazion ai 28 de nuvëmber
USP – Tl proscimo ann de scola, de autonn 2010 uniral tla Scola d’Ert Cademia a Urtijëi giaurì na sezion de mujiga. Ncuei 23 de nuvëmber à scumencià n’ena de pratica per sculeies dla scola mesana che finerà via n sada 28 de nuvëmber cun n di dla porta davierta per duc. N sada uniral fat de plu prejentazions dla cumposizion “art-fish-music”.
Jonta provinziela: mudazions per cuntribuc turistics
USP - La Jonta provinziela de Bulsan à mudà la regules per cuntribuc ala lies turistics. A na maniera nueva dëssel nce unì dat ora i cuntribuc per chëi che ie jic a sté oradecà y vën a cësa per la veles. I criteries per mëndri lëures che ne se damanda nia na cunzescion da frabiché ie unic lascei do. Chisc ie stai i argumënc de majer nteres prejentei dal presidënt Durnwalder (ncuei) ai 23 de nuvëmber do la senteda dla Jonta provinziela.
Premiazion y mostra per artisc' ladins a Bulsan
USP – Tla Galaria Prisma de Bulsan iel da udëi l’opres de artisc’ ladins che à fat pea l cuncors scrit ora dala Repartizion ala Cultura ladina dla Provinzia de Bulsan. N vënderdi sëira (20 nuvëmber) iel unì giaurì chësta mostra n ucajion dla premiazion de Philipp Messner y Giancarlo Lamonaca che à venciù l pest per artisc’ ladins.
Durnwalder sëurandà 29 uneranzes a atlec y funziuneres
USP – 17 atlec dla Provinzia de Bulsan che à venciù bedaies pra campionac dl’Europa y dl Mont à (nseira) ai 17 de nuvëmber pudù pië do dal presidënt Durnwalder l’uneranza di sportivi. Cun ëi iel nce unì unerà 12 funziuneres che se à fat merit. L sëul reprejentant ladin danter i unerei ie l campion dl mont de luesa Florian Clara da S. Martin.
„Air Alps“ jola danter Bulsan y Roma
USP – “Air Alps” julerà nce tl daunì da Bulsan a Roma. La sozietà de jol à venciù l cuncors per la linea sustenida dala Provinzia de Bulsan. “Per l Südtirol sciche raion economich-turistich ie l culegamënt ala rë nternaziunela de joi de gran mpurtanza, per chësta rejon vëniel sustenì la linea Bulsan-Roma chiran nce mo d’autri culegamënc” à dit l assessëur Widmann.
L Dalai Lama anconta la Jonta provinziela: autonomia y aiuc
USP – L Dalai Lama, la ncëira plu auta di budisc’ tibetians à ncuei (17 nuvëmber) ancuntà l presidënt dla Provinzia Durnwalder y pona nce duta la Jonta provinziela. Tl’ancunteda cun la stampa al mustrà gran recunescënza per la sensibltà y l sustëni da plu pertes tla Provinzia de Bulsan per si popul. “La China ie tl lëur de se mudé y n’autonomia sciche a Bulsan fossa per nëus na bona soluzion” à dit l Dalai Lama.
Jonta provinziela: sajons dl Aiut Alpin
USP – La Jonta provinziela de Bulsan à fat ora l scumenciamënt y la fin dla sajons canche l ie debujën dl servisc dl Aiut Alpin. Dan tò na dezijion n cont dl daz sun i jëufs dla Dolomites uelen da pert de Bulsan audì l’autra provinzies nteressedes. Chisc ie stai i argumënc de majer nteres per la populazion ladina, prejentei (ncuei) 16 de nuvëmber dal presidënt Durnwalder do la senteda dla Jonta.