Comunicat stampa

USP – La streda per ruvé a Rina ie bëndebò strënta no me curieres y camions se stënta tla raides, ma nce cun l auto ne iel nia dlonch mesun despassé via. L Assessorat provinziel ai lëures publics à udù dant de miuré y slargë duta la streda de feter 3,8 chilometri. Chëst ann iel unì finà l prim toch y do l inviern uniral riesc jit inant cun la segonda pert di lëures per miuré y garantì plu segurëza sun la streda de Rina. Da permò iel unì sëurandat i lëures dl segondo lot ala firma Wipptaler Bau de Sterzing.

USP – L’idea dl mparé duta la vita per duc – nce per chiche ie tla politica – à l presidënt Luis Durnwalder sotrissà ncuei (11 dezëmber) te si rujeneda sun l bilanz provinziel per l ann 2010. Chi che ie tla politica muessa aldò de Durnwalder mparé a tò la cundizions mudedes dala crisa y les nuzé sciche puscibltà.

USP – Uni ann vën i orars naziunei dla ferates mudei la segonda ena de dezëmber, per chësta rejon an nce tla provinzia de Bulsan messù adaté di orars. “Chësta mudazion nes desplej, ma la ne se lascia nia astilé ora” nsci l assessëur Widmann ncuei (9 dezëmber) te na cunferënza stampa. La majera nuvità reverda la ferata taliana che dal 13 de dezëmber tol demez l culegamënt zënza baraté ferata, danter Bulsan y Roma.

USP - La biblioteca provinziela "Dr. Friedrich Teßmann" sorissea l plurilinguism tla provinzia de Bulsan. La prejentazion te internet ie a chësta maniera nce unida fata tla rujeneda ladina.

USP – “Tla scoles elementeres de Gherdëina vëniel scrit feter tan bën tudësch sciche a tla scoles tudësces. I sculeies dl’elementeres dla Val Badia scrij belau tan bën talian sciche tla scoles talianes.” Chësc ie l resultat generel dl’analisa scientifica sun la cumpetënza dla rujenedes di sculeies ladins che ie unida prejenteda ncuei (09 dezëmber) a Bulsan te na publicazion.

USP – A Puntives iel unì njenià na stazion per museré l’autëza dl’ega tl ruf de Gherdëina. La mesurazions vën dates inant ala prutezion zevila. Nchinamo ne oven nia tres ora l cuntrol sun l Derjon, l livel dl’ega ie me unì muserà uni tant.

USP - L jëuf de Frea ie ncuei (02 dezëmber) unì sarà al muvimënt di auti per pericul de levines.

USP – La Jonta provinziela de Bulsan se ova dl 2004 tëut dant che l culegamënt internet a “banda lergia” dëssa arjonjer dut l raion. Chësc fin ie sën unì arjont. “L culegamënt internet che va debota dëssa nce unì pità a chiche sta ora di zëntri” à sorissà i assessëures Mussner y Berger ncuei (02 dezëmber) pra la prejentazion di lëures.

USP – La reforma dla scola auta y dl’università tla Talia y la situazion particulera tla provinzia de Bulsan ie argumënt dla cunferënza ai 11 de dezëmber n ucajion dla fiera Futurum. Reprejentanc dl’universiteies de Dispruch y de Bulsan menerà na descuscion cun respunsabli dl Minister per l’istruzion y dl Minister per l lëur.

USP – Tla scoles ladines ie unì fat n’evaluazion linguistica di sculeies dla cuinta tlasses elementeres. Deberieda cun esperc dl’Università de Bulsan iel unì analisà la nrescida y paredlà cun sculeies de rujeneda tudëscia y taliana. I resultac de chësta evaluazion scientifica ie unic publichei te n pitl liber che unirà prejentà n mierculdi ai 9 de dezëmber tla Ntendënza Ladina a Bulsan.