Comunicat stampa

USP – La Jonta provinziela de Bulsan à dat pro l program di lëures publics che dëssa unì fai ntan l ann 2010. A una dla proscima sentedes à messù unì spënta la dezijions n cont dl fond de rotazion, l cuntrat de urbanistica y l plann dal’eghes. Chisc ie stai i argumënc de majer nteres che la Jonta provinziela à tratà ncuei, 8 de fauré te si furmazion nueva cun l assessëur Roberto Bizzo.

USP – I tëmps che maestri de schi, mëinacrëp y mëinaschi ova l’esclusiva, ie passei. “Aldò dla norma europea per servijes possa chësta categuries de lëur pité servijes te dut l rain europeich”, nsci l assessëur Hans Berger che se à cunsià cun i maestri de schi co che n possa garantì la cualità tenian cont dla cundizions atueles. Tl’ancunteda iel nce unì rujenà dla lege cheder statela per i maestri de schi.

USP – Ncuei, lunesc 8 de fauré muef l presidënt dla Provinzia Luis Durnwalder per n viac de diesc dis tl’Africa. Tla ncëria de assessëur per culaburazion de svilup dla Jonta provinziel vijiterà Durnwalder de plu proiec de svilup tl Kenia, Uganda y tl Sundan dl Sud, che vën finanziëi dala Provinzia de Bulsan.

USP – Doi cuncorsc per sustenì i artisc’ dl post mët a jì l Museum Ladin de S. Martin de Tor. Chëst ann vëniel per l segondo iede metù a jì l pest de scultura dunà da Richard Agreiter y la “Trienala Ladina” ruva bele a si terza edizion. Tramedoi scumenciadives unirà prejentedes n mierculdi, 10 de fauré a Bulsan.

USP – L Cunsëi di ministri a Roma à ncuei (4 fauré) dat pro la reforma dla scola auta che dëssa bele jì n drova d’autonn sun dut l raion naziunel. Tla Provinzia de Bulsan jiral al’incontra permò n drova cun l ann de scola 2011/12. “Chësc spënjer dla reforma tlo da nëus nes da l tëmp dl’adaté a nosta situazion speziela” spiega i assessëures provinziei ala scola. Legrëza fej la puscibltà de na matura prufesciunela.

USP – L cumplì di ani dl scuvridëur che à fat mudé l mond, ie ucajion per n’ena de manifestazions tl Museum dla natura a Bulsan. Cun na cunferënza scumëncia l’ena de Darwin duman, vënderdi 05 de fauré y jirà pona inant cun na festa per mëndri n juebia grassa y n cabaret per duc ntan l fin dl’ena. La scumenciadives per lecurdé Darwin ie unides prejentedes ncuei (4 fauré) a Bulsan.

USP – L presidënt dla Provinzia Luis Durnwalder à sotscrì l decret per sëurandé ufizialmënter la cumpetënzes al assessëur provinziel nuef Roberto Bizzo per la XIV legislatura. Ël sëurantulerà i ciamps de lëur che ova Barbara Repetto, ora dla furmazion prufesciunela per la grupa de rujeneda taliana, che ti va al assessëur Tommasini.

USP – Ideies nueves per miuré la culaburazion danter turism y lëur da paur: chësc ie chël che l Dipartimënt provinziel per l lëur da paur y turism chier tres n cuncors metù a jì deberieda cun la lia provinziela di osc’ HGV y la lia provinziela di paures SBB. Nchin ai 12 de fauré possen mo fé pea l cuncors.

USP – La bibliotech provinziela „Teßmann“ a Bulsan unirà s’areda domesdì de n juebia grassa y merdi de carnescià.

USP – Per feter 2500 patrons de vedla cunzescions dal’ega iel na bona nutizia: si dërc che ëssa dassù tumé cun la fin dl 2009 ie unic slungëi de 20 ani. “A chësta maniera possel unì adurvà l’ega zënza che i patrons muessa se cruzië de giapé la cunzescion da nuef” spiega l assessëur provinziel Michl Laimer. La Provinzia de Bulsan vën nce ancontra canche la se trata de nuzé l ciaut da fonz su.