Comunicat stampa

USP – “Wer rettet die Helden?” sota chësc titul se prejënta l Forumtheater Andreas Hofer 2010 n vënderdi ai 12 de merz a Urtijëi. L pez trata de argumënc esistenziei y dassënn umans tenian cont dl cuntest storich, nvian tl medemo tëmp l publich a fé pea. L Forumtheater ie na scumenciadiva dl Ufize provinziel per la furmazion.

USP – 52 milon de euro dl fond provinziel de rotazion dëssa mo chëst ann unì metui a desposizion per l turism. La Jonta provinziela de Bulsan à ncuei (8 merz) nce dat pro la pruposta de vënder azions dla Sel Holding ai chemuns y cunselieres nueves per l’università. Do la senteda dla Jonta à l presidënt Durnwalder ntan la cunferënza stampa unerà l di dl’ëila.

USP – L assessëur ala mendranzes dla Val d’Aosta Laurent Viérin ie unì a Bulsan per ancunté l assessëur ladin Florian Mussner. Danter l barat de esperienzes n cont dla situazions dla mendranzes iel unì cuncretisà la prejënza dl assessëur Mussner pra l festival dla mendranzes che sarà ai prims de setëmber tla Val d’Aosta.

USP – Doi dis per jì a cialé y purvé a depënjer, mudelé o ziplé: chësc pieta la Scola Prufesciunela per l artejanat artistich ai 12 y 13 de merz. I dis de porta davierta per sculeies y families scumëncia bele la sëira dant cun na descuscion publica sun la furmazion y marcieies dl artejanat artistich de Gherdëina.

USP - Cun la mort de Klaus Dubis pierd la populazion ladina n sustenidëur, na persunalità drët sciazeda y n politich de gran savëi” Cun chësta paroles unerea l assessëur provinziel ladin Florian Mussner y l presidënt Durnwalder te si cunduel Klaus Dubis, mort ai trëi de merz. Ël fova stat cunselier provinziel, assessëur regiunel y ova nce purtà inant la fundazion dl Istitut culturel ladin Micurà de Rü.

USP – L nteres dl publich ie stat majer che i urganisadëures se ëssa aspità: nsëira, 4 de merz, iel tl filmclub de Bulsan unì prejentà cun suzes l film sun i ladins ntan l 20esim secul. La se trata de film documenter pe mustré su l destin dla jënt ladina y per se de jù cun na pert scura dla storia ladina. Cun si prejënza à na gran cumpëida de jënt respundù cun entusiasm al nvit dl presidënt Durnwalder y dl assessëur ladin Mussner.

USP - La cumiscion per lauré ora la lege provinziela nueva sun la Reforma dla Scoles Autes y dla furmazion prufesciunela, metuda adum da reprejentanc dla Ntendënza Ladina, Taliana y Tudëscia y dla furmazion prufesciunela, sun ncëria di Assessëures ala Scola Mussner, Kasslatter Mur y Tommasini, se à ancuntà plu iedesc y ie a n bon pont per mëter dant per tëmp y ëura l documënt ai organns politics dla provinzia.

USP – La Jonta provinziela à dat pro na normativa nueva per sëurandé lëures publics spartì su do mestieres, ti unian ancontra ala firmes da tlo respetan purempò la normes stateles. L Presidënt Durnwalder y l assessëur Mussner à ncuei (02 merz) prejentà la nuviteies che juda a seguré stieres y lascia sën riesc sëurandé lëures publics.

USP – Sun scumenciadiva dla trëi ntendënzes provinzieles se anconta (duman) ai 3 de merz nsenianc y culaburadëures pedagogics per n barat de esperienzes. La terza ancunteda per maestres y maestri dla trëi grupes de rujeneda vën tenì tla Ntendënza ala scola tudëscia a Bulsan y ie dedicà ala scolina ladina.

USP – Ai zitadins che vën da ora dl’Europa y che ie bele cin ani tla provinzia de Bulsan ti spieta 9,11% de scioldi a desposizion per cuatieres soziei, aiuc a cumpré l cuatier y cuntribuc per paië l fit. La Provinzia ie tl lëur de anjenië cunzec de renuvamënt per de plu chemuns. Chisc ie i argumënc prinzipei che l Presidënt dla Provinzia Luis Durnwalder à prejentà do la senteda da ncuei (prim merz) dla Jonta provinziela.