Comunicat stampa

USP – Te si senteda da ncuei (15 merz) à la Jonta provinziela tratà cuestions dl’acurdanza finanziera cun l Guviern de Roma che muessa unì marciadedes ajache l uel vester na norma de atuazion. Danter i cin ponc zentrei ie i cuntroi dla Guardia di Finanza, cuntroi statei sun ativiteies provinzieles y la perjon de Bulsan. Do senteda dla Jonta à l presidënt Durnwalder nce prejentà la dezijions n cont dl program per culegamënc internet y dl zënter de nfurmazion dl tunel dl Prëner.

USP – Giapé na mprescion virtuela dla set cëses di parcs naturei tla provinzia de Bulsan: chësc servisc pieta da permò l Ufize provinziel per i Parcs naturei. Ti cialan a fotografies panoramics che mostra la udleda a 360 gradi possen tres internet mparé a cunëscer cie che pieta la singula cëses di parcs naturei jan nce a se cherdé ca nfurmazions spezieles.

USP - Le archif digital di foliec dla Biblioteca provinziala Friedrich Teßmann contëgn sëgn ince le foliet „Boten von Tirol und Vorarlberg“ che é gnü digitalisé deboriada cun les biblioteches de Vorarlberg, Tirol y dl Trentin por ci che reverda i agn 1813-1919.

USP – Aldò dl Istitut provinziel de statistica ASTAT iel ala fin dl ann 2009 unì arjont l pont storich plu bas n cont de fic global efetives (TAEG) per n mprëst ipotecar de 150.000 euro da paië ju te 20 ani, cun rates variables de mez ann. N media fova chisc fic de 3,4%, che ie trëi ponc de manco permez al ann dant (6,4% tl 2008). Manco fic à purtà i conc curënc (-1%) y nce l fit al ann sun scioldi s’arei per 18 y 6 mënsc (da -1,6% a -1,9%).

USP – Aldò l Istitut provinziel de statistica ASTAT à l 17,2% dla populazion provinziela cunsumà te na sëula ucajion passa sies goc de buandes alcoliches. I ëi bev ora di cëifs de plu buandes alcoliches permez al’ëiles.

USP – Se nuzé dl’energia cun fundamënt, ressanamënc energetics y svilupé l’energia da adurvé plu suvënz: chisc ie i ponc zentrei dl pachetl nuef per defënder l tlima, dat pro dala Jonta provinziela. “La diretives de suvenzion nueves”, nsci l assessëur provinziel Laimer, “dëssa fé deventé la provinzia de Bulsan n KlimaLand”.

USP – La scoles autes te Gherdëina y tla Val Badia pieta per l ann de scola che vën nuviteies. A Urtijëi vëniel pità mujiga y sport, a La Ila na furmazion soziela y pedagogica. Nteressei ala scola auta paritetica ladina possa mo nchin ai 31 de merz se scrì ite per la ann de scola 2010/11.

USP – La lege provinziela nueva sun la valivanza di dërc danter ël y ëila vën publicheda n merdi che vën, 16 de merz, tla Gazëta Ufiziela dla Region y va n mierculdi n drova. La nuvità prinzipela de chësta lege reverda la cumposizion de cunsëies che messerà vester valiveda ora danter ëi y ëiles.

USP – Aprufondimënc dla ntraunides plu mpurtantes dla Jonta provinziela y dl’Aministrazion provinziela ntan i ultimi doi mënsc ie onlne sun la plata internet dl Ufize stampa provinziel (www.provinzia.bz.it/uspl). Publicà iel nce na panoramica sun la dates mpurtantes tl mëns de merz.

USP – A Pedraces possel unì fat da nuef la ncrujeda sun l stradon per furné a S. Lenert de Badia. Sun pruposta dl assessëur ai lëures publics Florian Mussner à la Jonta provinziela dat pro lëures per n custimënt de 427.000 euro.