Comunicat stampa

USP – L’autonomia dla sezion dl Südtirol di arbitradëures de juech al palé unirà inò recunesciuda. Chësc ie unì segurà dal’assoziazion AIA al presidënt Luis Durnwalder do che l regulamënt nuef udova me plu dant na sezion regiunela. De chësta dezijion se ova l Presidënt dla Provinzia parà ajache la jiva contra l’autonomia dl sport.

USP – I obietives dl’Aministrazion provinziela de sparanië ie unic arjonc. La Jonta provinziela à ncuei (29 merz) dat pro che de crì manieres nueves per pudëi mo sparanië ti medemi ciamps. Do la senteda dla Jonta à l presidënt prejentà la dezijions de majera mpurtanza, danter chëstes nce co jì inant cun la reforma dla scoles autes dl Südtriol y canai de televijion nueves che sarà da udëi tres la RAS. Danter chisc nce la Televijon Rumacia tla cualità HD.

USP – La populazion de S. Crestina ie nvieda a respuender a n cuestioner sun l zënter dl luech che vën mandà tla families mo dan Pasca. L’Assessorat provinziel al cumerz à cris ora S. Crestina sciche prim chemun pilot per nvië via n proiet de valorisazion dl zënter aldò de lege provinziela. Fin de dut l proiet ie chël de lauré ora pruvedimënc y scumenciadives per miuré l’atratività dl zënter dl luech.

USP – Trëi ani se à culaburadësses pedagogics dla Val Badia y de Gherdëina dat ju cun na furmazion per se adaté a si cheder prufesciunel nuef. N mierculdi 31 de merz puderà 35 culaburadësses pië do dala 5 domesdì, tla scolina Salieta a Urtijëi, i diploms dal assessëur ladin Florian Mussner.

USP – 45 chemuns à damandà de unì tëuc n cunsciderazion per l program di 1000 cuatieres per families cun n davani mesan. Danter chisc iel nce i chemuns ladins de Urtijëi, Mareo y Ciastel. L assessëur Christian Tommasini à scrit na lëtra ai chemuns se damandan che i feje al savëi nchin ai 24 de mei la despunibltà dl grunc da frabiché.

USP – Sun la pert dla Val de Funes vën da n lunesc, 29 de merz sareda la streda de Börz. A Coll, a S. Piere de Funes vëniel fat lëures a na maniera che l ie debujën de saré la streda per feter trëi enes.

USP – “N savëi sane te n corp sane”: do chësc moto ti dà la scola gran mpurtanza al nseniamënt de sport. Per nrescì ulache l ie pusciblteies de miuramënc y de mudamënc ie unì fat n studi cun na majera nrescida. Aldò de sculeies, genitores, nsenianc, diretëures y funziuneres tla lies, ie l nseniamënt de sport dassënn mpurtant, me che l vën tenì massa puecia ëures. I resultac ie unic prejentei ncuei (25 merz) dai assessëures provinziei ala scola deberieda cun i tecnics dl ciamp.

USP – La bibliotech provinziela "Dr. Friedrich Teßmann" a Bulsan resta stluta da n Vënderdi Sant ai 2 de auril nchin ai n Lunesc de Pasca, 5 de auril.

USP – Dé inant la pascion per l parch naturel a jëuni de 10-12 ani acioche i posse deventé partner per l daunì: chësc ie l fin che l Ufize provinziel per i Parcs Naturei deberieda cun i jëuni dla Lia da Mont (AVS) se à l ann passà tëut dant per l prim iede. Do l suzes dla prim edizion di „Junior Ranger“ di parcs natuei, vëniel nce chëst ann pità a chiche se scrij ite nchin ai 28 de auril.

USP – L’ëila sun la cherta de trionf y l argumënt zentrel dedicà al ëila te posizions politiches: nsci se prejënta "ëres-frauen-info-donne", te si prima edizion da chëst ann. Te n format y cialé ora nuef ie la publicazion dla Cumiscion provinziela per la valivanza dla chances da giapé debant.