Comunicat stampa

USP – Sun co che la streda dla Val Badia dëssa ji inant a Longega iel chëst ena unì cialà plu avisa dal pert dl Assessëur Florian Mussner sun nvit dl Chemun de Mareo. Deberieda cun rapresentanc dl Chemun y la jënt de Longega iel unì ejaminà la situazion.

USP - L Intendënza Ladina à laurà ora 5 publicazions nueves per la scoles: “Aules”, “Sann intun”, “Portfolio dla cumpetënzes”, “Portfolio di lingac” y “Uniteies de ELI”. Chësta publicazions possa vester de ntres per duc chei che lëura tl ciamp dl educazion.

USP – L di mundiel dl’alfabetisazion dl UNESCO, che ie unì cherdà ora per ncuei mierculdi, 8 de setëmber 2004, lecorda che te truep paejes dl mond iel nce mo al diadancuei n privileg a savëi da liejer y da scrì. L fin de chësc di ie de lecurdé l fenomen dl analfabetism y de cumbater decontra. „Savëi da liejer y da scrì ie per uni persona na premissa per si svilup personel y soziel“ scrij i trëi assessëures ala scola Florian Mussner, Luisa Gnecchi y Otto Saurer.

USP – La grupes "Die Ladiner" primes, Belsy sgonda y Brigitte Aichner, alias "Angelina" terza, majer ne ëssa nia pudù vester l suzes di nterprec dl Südtirol pra l Grand Prix dla mujiga da mont. Per telegram à l presidënt dla Provizia Luis Durnwalder y l assessëur Ladin Florian Mussnser mandà i auguresc ai „ambasciadëures musichei“.

USP – Nsenianc y educatëures dëssa muever tl ann de scola nuef cun otimism, à dit l assessëur ala scola ladina Florian Mussner ncuei vënderdi, 3 de setëmber a Urtijëi. N presënza de ntëur 300 nsenianc y educatëurs iel ncuei unì nvià via l ann de scola 2004/05 cun l Di dla Scola Ladina.

USP - „SiTaR – Sustainability in Tourism and Resourcemanagement“ se tlama l proiet nuef dla UE, che la Ripartizion proviziela per l turism porta inant deberieda cun l Burgenland dl Austria, l Landkreis Waldeck-Frankenberg (Deutschland) y „West-Pannon Development Agency“ dla Transdanubia dl ovest tl Ungarn. Duc i nteressei a chësc proiet possa n mierculidi ai 8 de setëmber 2004 passé tla cësa provinziela „Palais Widmann“ a Bulsan per nrescì velch de plù.

USP – Nteressei a n lëur a tëmp determinà tla Provinzia de Bulsan, à mo dl’aurela nchin ai 15 de setëmber per de jù la dumanda. La cundizion che n venie tëui su tla graduatories dla defrënta ncëries ie la dumanda scrita.

Aldò dl ASTAT iel de lugio 2004 stat 1,2% de plu nuetes afitedes tl Südtirol permez al medemo mëns dl ann passà. La prima pert di resultac dla sajon da instà 2004, da mei a juni, mostra su n aumënt de 1,3% pra la persones ruvedes adalerch ma na diminuzion de 0,9% pra la nuetes afitedes.

L cudejel dl muvimënt sun streda tla provinzia de Bulsan “Verkehr in Südtirol - 2003” dat ora dal Istitut provinziel de statistica ASTAT ie dan man. La plublicazion ie da giapè tl ufize dl Istitut provinziel de statistica tla streda Duca-D’Aosta. Tres internet iel sun la plata http://www.provinz.bz.it/astat, link „Daten online“, nce puscibl se lascé ora la tebeles alò che n les ëssa gën.

USP – Do la sajon da instà uniral da n lunesc ai 30 de agost inò sarà la streda dla Val Badia da Longega a Mantëna Todëscia ai auti. I lëures dëssa inò pudëi ji inant zënza interuzions per pudëi i finé per tëmp. I mesuns de trasport pesonc pudrà passé bas ite, ntan che i auti muesserà to la stredes panoramiches de deviazion.