Comunicat stampa

USP – L 60% di lëures per la streda dla Val Badia nueva ie bele finei. Nchin a sën iel unì frabicà per 54,5 milion de Euro y nce sce n ie al mumënt n pue’tardives dessa i lëures unì finei via tl tëmp udù danora. Chësta nfurmazions à l assessëur ala stredes Florian Mussner ncuei, vënderdi ai 9 de lugio, dat inant ai ambolc y ai rapresentanc di chemuns tuchei dai lëures, pra n’ancunteda a Mantëna Todëscia.

USP – L’istituzion de n aucat per mutons y jëuni ie for plu daujin. L assessëura Sabina Kasslatter Mur, che à giapà la ncëria dala Jonta provinziela de lauré ora n cunzet per mëter sun chësc aucat, à sën metù sù na grupa de lëur che se à ncuei, juebia 8 de lugio, ancuntà per l prim iëde. „La grupa de esperc dëssa judé a mëter mpé n cunzet che tol n cunsciderazion i bujëns de pusciblmënter truep mutons y jëuni“ à sorissà l’assessëura ncuei a Bulsan.

L Istitut provinziel de statistica ASTAT à dat ora na plata sun l turism tl Südtirol ntan la sajon 2002/03. Tlo vëniel comunicà la vela dl’ativiteies che dà albierch cun la cumpëida dl’ativiteies y di liec. Mplù possen nce liejer do analises y n paredledes dla dumanda turistica (persones ruvedes adalerch y nuetes afitedes). Tl studi vëniel nce presentà n analisa di luesc turistiches plu atratives. I doi luesc ladins Corvara y Sëlva ie da abinè dancà de chësta tlassifica dan a i luesc de Schenna, Tirol y Maran.

USP – Dla situazion di lëures sun la streda dal Val Badia y sun i pruvedimënc de segurëza dajerà l assessëur Florian Mussner y i tecnics de cumpetënza nfurmazion. La sëira de nfurmazion n vënderdi, ai 9 de lugio dala 17.00 sun l post di lëures a Mantëna Todëscia, vën metuda a ji datamprima per i ambolc y i rapresentanc di chemuns nteressei.

USP – Cun vel servisc sëuraprò uël la Provinzia ti unì ncontra a chëi che muëssa paië ite la chëuta sun l auto cialan a chësta maniera de ti unì ncontra ai chëi 9% che fej mo for truep fai a paië ite. Sun pruposta dl assessëur ala finanzes Werner Frick à la Jonta provinziela ncuei, lunesc 5 de lugio, dat pro i servijes sëuraprò y la cunvenzion cun l club abtomobilistich ACI. De setëmber uniral metù man cun n scrit de nfurmazion y l fé al savëi che n pudrà nce paië ite tres internet zënza spëises.

USP- N cont de ntegrazion dëssel unì metù a jì de plu furmazion y de plu ancuntedes per miuré la comunicazion danter la scola, genitores y i servijes soziei. Chisc ie i resultac de n studi sun la cualità dla ntergrazion de persones cun handicap tla scoles dl Südtirol ntan l ann de scola 2002/03. Sun basa naziunela ie la Provinzia de Bulsan mo for danora n cont de ntegrazion soziela. I trëi assessëures ala scoles Otto Saurer, Luisa Gnecchi y Florian Mussner à presentà l studi.

USP – A Caterina Lanz, cumbatënta per la libertà de si popul ie dedicheda na mostra tl Museum Ladin a San Martin de Tor. L’ucajion de chësta mostra pieta i 150 ani dala mort de Caterina Lanz, nasciuda a Al Plan de Mareo tl 1771 y morta te Fedom tl ann 1854. La giaurida dla mostra ie n dumënia ai 11 de lugio.

L’Assessorat provinzial por la cultura ladina inviëia en vëndres, ai 9 de messè 2004, düć i interessá ala premiaziun di davagnadus dla pröma ediziun dl concurs leterar ladin “Auturs ladins scrì …”, Maria Pedevilla de La Plì de Mareo y Ivan Senoner de Urtijëi.

La populazion dl Südtirol ie cresciuda de 1.669 persones y à ai 31 de merz arjont la cumpëida de 473.306 persones. Tl prim trimester dl 2004 ie nasciui 11,1 popesc (vives) sun 1.000 abitanc. La cuota di morc ie stata de 8,8 sun 1.000 abitanc. Te chësc prim trimester iel unì cumpedà 4.216 persones che ie unides a sté tl Südtirol y 2.816 che se n ie jites dala Provinzia de Bulsan, mustran su n aumënt permez al medemo tëmp dl ann passà. La defrënzia danter jic y unic tla provinzia ie do la rata granda y fej ora na cumpëida de 1.400.

Per cont dla Ntendënza ladina iel unì ora l CD-rom cun i lëures di studënc de n valguna scoles autes dla provinzia tl cheder de n proiet sun la “Costituzion Europeana” metù a jì l ann de scola iust passà. Al proiet à tëut pert l ITC de Urtijëi, l IPC y Lizeum talian de Persenon y l ITC tudësch de Bornech. Ndut 90 studënc cun si nsenianc.