Comunicat stampa

LPA - USP - L ie for plu suvënz che scoles de rujeneda tudëscia o taliana se damanda material de nfurmazion sun la storia, cultura, usanzes y la rujeneda ladina. A chësta maniera à l assessëur ladin Florian Mussner nciarià l Istitut Pedagogich Ladin (IPL) de lauré ora n cunzet per material didatich per la scoles tudësces y talianes sun la cultura ladina. “Tres chësc cunzet giapa sculeies dl’autra grupes de rujeneda l’ucajion de mparé a cunëscer miec la grupa de rujeneda ladina cun si storia, cutura y rujeneda” sorissea l assessëur. Acioche l vënie nce laurá dl dre vieres, à l IPL fat na nrescida pra la scoles mesanes de rujeneda tudëscia y taliana.

USP - Danter ater à la Comisciun tecnica aprovè inier, lönesc ai 6 de jügn le proiet dl’aministraziun provinziala de fà sö n convit por scolares y scolars a Urtijëi.

USP - I posc’ de laûr tles scolines ladines ales maestres y assistëntes che é sön la graduatoria provinziala por l’ann de scolina 2005/06 vëgn dà ia en jöbia, ai 9 de jügn a Urtijëi.

USP - La Ciamena di jornalisc nazionala a Roma ti à spôrt n gran lalt al Istitut tecnich comerzial „Raetia“ da Urtijëi por so foliet scolastich „Orange Juice“ metü adöm te na manira ejemplara. N valgügn scolars y insegnanc dl comitê de redaziun à podü pié do ai 24 de mà a Roma n pest da pert de Lorenzo Del Boca, presidënt dla Ciamena di jornalisc nazionala. Le foliet plajor y interessant tëgn ajornà plü iadi al ann la comunité scolastica, mo sambëgn ince i geniturs y d’ atri jogn sön tematiches che reverda la scora, le sport, proiec, tendënzes y en general argomënc por la jonëza.

USP - Chësta edema à la IIª Comisciun provinziala por la sconanza dla contrada cun a ce Adriano Oggiano dè so bëgnstè por la realisaziun dla pista “Dantercepies – Panorama” tl comun de Sëlva. Sciuré zoruch é indere gnü le proiet de realisaziun de na pista sön „Ciampinoi“ te Sëlva.

USP - N gröm de scolares y scolars talians y ladins à tut pert al concurs pro le proiet „Lì…por devertimënt“. I mius laûrs gnarà premià en vëndres, ai 27 de mà 2005 tla scora dl comerz „Claudia De Medici“ a Balsan dal’assessuria provinziala Luisa Gnecchi.

LPA - Pro n convëgn dles mendranzes d’Europa sot al moto „Partnership of diversity“ tignì a Gorizia sön le confin danter la Talia y la Slovenia éra jüda dl valur ajuntè di lingac de mendranza te düc i seturs, dal’aministraziun al ciamp dla formaziun y dl’istruziun, dai massmedia al setur dl turism. L’assessur Florian Mussner à portè dant la situaziun te Südtirol.

USP - „L se ancunté y se giamië ora de cultures defrëntes ne comporta nia me risich, ma porta nce l’ucajion de se arichì l un cun l auter. La cundizion per arjonjer chësc ie l dialog danter la cultures, te chël che la singula cultura possa crëscer, restan davierta permez al’autra cultures.” Chësc ie l pensier dl assessëur ala scola y cultura ladina per ncuei sada 21 de mei, di mundiel per l svilup culturel numinà dal UNESCO. La cultura ladina, y dantaludt la rujeneda ladina dëssa unì cureda, ajache l ie la basa per la identità culturela de na mendranza, nscì Florian Mussner.

USP - Te chisc dis é Cianacëi tl zënter dl’informaziun por i Ladins. Cotan de jornalistes y jornalisc ladins é rovà adalerch dales cater valades ladines, dala Val Badia, da Gherdëna, Fascia y Fodom y cinamai dala Svizra rumancia por tó pert ala pröma incuntada di jornalisc ladins che à metü man inier jöbia, ai 19 de mà 2005. Chësta incuntada che jarà inant por trëi dis alalungia é gnüda metüda a jì dala Provinzia de Balsan en colaboraziun cun le departimënt ladin. Inier êl ince presënt l’assessur Mussner.

USP - Chësta edema à la IIª Comisciun provinziala por la sconanza dla contrada cun a ce Adriano Oggiano valuté indöt 25 proiec danter chisc ince na ligna de interesc privac. La Comisciun à dè so bëgnstè por la conformaziun dl terac tres spostamënc de material sön pistes ti comuns da Corvara y Badia.